Illoqarfissuit siuariartorpata atugarissaarneq qulakkeerneqassaaq
Nunatsinni utoqqalisartut amerliartorput, inuiaqatigiinnguusugullu inuuneqqortusiartorpugut. Tamannalu aningaasartuutaassaaq annertuumik.
- Nunani Avannarlerni nunat innuttaasa siunissami atugarissaarnissaat anguneqassappat, taava illoqarfinnik ataasiakkaanik nukittorsaanissaq pingaaruteqarpoq.
Taama isumaliutissiissuteqartut innersuussuteqartullu tassaapput, Nunani Avannarlerni isumalioqatigiissitamik taaneqarsinnaasoq. Tassani ilaasortaapput inuit arfineq pingasut, taakkunannga marluk nunatsinneersuullutik, tassaasut Polar Seafoodip siulersuisuunerini siulittaasoq, Henrik Leth aamma Ilisimatusarfimmi rektori, Tine Pars.
- Eqqarsaqatigiinni eqqartorparput, illoqarfiit ataasiakkaat nukittorsarneqarpata, tamanna nunaqarfinnut nukittorsarneqartullu illoqarfiit taassuma eqqaaniittunut tamanna sunniuteqassasoq pitsaasumik, soorlu Islandimi tamanna misilittagaasoq, Ilisimatusarfimmi rektori, Tine Pars taama oqarpoq.
Nunatsinni illoqarfiit ilaasa eqiteruffiullutik nukittorsarneqarnerani nunaqarfiit illoqarfiillu ilaasa inuerutivissornissaat eqqarsaatersornerup siunertarinngikkaa, siunertaallunili inuiaqatigiit nukittorsarnissat takorloorneqarluni, Tine Pars erseqqissaavoq imalu nangilluni:
- Nunatsinni ineriartornissaq nammineeriartornissarpullu eqqarsaatigalugit, utoqqaat amerliartorneri, piumasaqaatit napparsimmaveqarfinnut allanullu annertusiartornissaat, innarluutillit tamatigut sullinneqartalernissaat allarpassuillu eqqarsaatigalugit Nunatsinni inoqarfiit siaruaakkutsigit tamanna inuuniarnermut oqinnermut aallaaviunavianngilaq, taamaattumik illoqarfinnut eqiterussinissaq takorloorlugu isummersorpugut, Tine Pars oqarpoq.
Nunatsinni kommunerujussuit sisamat siunissami nukittorsassagaanni illoqarfiit ilaat nukittorsarneqartariaqarput, tamannami Nunani Avannarlerni nunat ilaanni takussutissaqareerpoq, taamatullu Nunatsinni aamma siunniunneqarsinnaasoq, Tine Pars oqarpoq.
- Illoqarfinnik ataasiakkaanik nukittorsaaneq takorluugaavoq. Tassami illoqarfik nukittooq ineriartortikkutsigu tamanna eqqaamiuinut kommunimullu tamarmut sunniuteqassaaq pitsaasumik. Illoqarfimmili nukittuumik pilersitsinermi kikkut tamarmik peqataanissaat pingaaruteqartoq, Tine Pars oqarpoq.
- Illoqarfimmit ineriartortitsineriarutta nunaqarfinni illoqarfinnilu inuttaasut takorluukkamut peqataatinneqarnissaat pingaarutilerujussuuvoq, tassami taakku ilisimaneruvaat ineriartortitsinermut qanoq peqataasinnaanerlutik, Ilisimatusarfimmi rektori, Tine Pars taama oqarpoq.
Nunat Avannarliit Isumalioqatigiissitaani ilaasortat, Tine Parsip Henrik Lethillu saniatigut Savalimmiormiut marluk Norgemiut marluk Islandimiullu marluk ilaasortaapput.
