Illoqarfinnut marlunnut qimagutitinneqartut

Politiit Uummannap sulluani nuna qaqqanit sisoorsinnaaneranut tamatumalu malitsigisaanik tassaarsinnaaneranut suli aarlerisaarisut, politiit unnerluussisussaatitaasuata Liselotte Bøhmip ilisimatitsissutigaa.

Niaqornani Illorsuarnilu qimarngutsitsinerit maanna naammassereersut taassuma aamma ilisimatitsissutigaa.

Facebookkikkut tusatsiakkat eqqunngitsut

Illorsuarni innuttaasut Uummannamiipput, Niaqornanilu innuttaasut umiarsuarni Ejner Mikkelsenimiinngikkunik Vædderenimiipput.

Inuit Vædderenimut ilaasut Uummannamukaanneqarput, Ejner Mikkelsenimullu ilaasut Aasiannukaanneqarlutik.

Facebookkikkut tusatsiarneqarpoq, Ejner Mikkelsenimut ilaasut Ilulissanukaanneqartut. Taakkuli Aasiannukaanneqartut, Liselotte Bøhmip erseqqissaatigaa.

Maanna qanoq iliornissaq isumaliutigineqartoq

Saattuni, Ukkusissani Qaarsunnilu innuttaasut qimagutitinneqassanersut politiit suli isumaliutigaat.

Najugaqarfinni taakkunani imaq ulikkiartornersoq suli nakkutigissagaat, politiit nalunaarutigaat. Imaq ulikkiartorpat siggartaalluunniit kalerrisaarut aallartippat erngertumik qaqqamukartoqassaaq.