Politiit: Nunaqarfiit sisamat immap ulikkiartornera nakkutigissavaat
Taamaattumik Kalaallit Nunaanni politiit isumannaallisaanermut nalunaarummik ima ittumik tusarliusseqqusipput.
Innuttaasut Uummannap sulluaniittut Illorsuarnilu najugaqartut tamarmik peqquneqarput, nunamut qutsinnerusumukassasut, sineriallu qanittuanit qimaguteqqullugit. Kalaallit Nunaani politiit Illorsuarni innuttaasut qimagussorlugit maanna aallartikkaat, Kalaallit Nunaani politiit tusagassiuutinut nalunaaruteqarlutik taama allapput.
Aamma nunaqarfinni sisamani, Saattuni, Ukkusissani, Niaqornani, Qaarsumilu innuttaasut immap qanoq issusaa nakkutigissagaat, politiit paasissutissiipput.
Siggartaat kalerrisaarut aallartippat imarlu ulikkiartorpat, innuttaasut erngerlutik qaqqamukassapput.
Tamatuma saniatigut ilisimatitsissutigineqarsinnaavoq, Illorsuarni innuttaasut Issittumi Sakkutooqarfiup umiarsuaataanut, Vædderenimut, qulimiguulimmik qimagussuunneqartut.
Innuttaasut atisanik oqortunik nerisassanillu taamaallaat nassarnissaat, Politiit unnerluussisussaatitaasuat Liselotte Bøhm oqarpoq.