Illoqarfimmiut kisimik pikkorissartinneqassapput

Qaasuitsup Kommunia aalisartunut nunamilu suliffissuarni suliffissaaruttunut ulluni makkunani pikkorissartitsivoq. Taamaattorli kommuunip pikkorissartitsinissamut neqeroorutaa illoqarfimmiunuinnaq atuuppoq. Tamannalu Qaarsuni aalisartut piniartullu peqatigiiffiannit pakatsissutigineqarpoq.
decembarip 01-at 2011 12:16

Nunaqarfimmiut immikkoortinneqarnertik isornartorsiorpaat.

Uummannami nunaqarfiinilu qaammatit pingasukkaarlugit qaleralittassanut pisassiissutit kingulliit oktobarip 16-ani nungunneqarput. Qaleralittassaarunnerup kinguneranik Qaasuitsup Kommuniata aalisartunut nunamilu suliffissuarni sulisunut pikkorissaanissat pilersaarusiulerpai.

Kommunip pikkorissartitsinerit suut ingerlassimanerai aammalu decembarimi ingerlanneqartussat Radioaviisimit misissuinermi takuneqarsinnaavoq illoqarfinni pingasuni, pikkorissarnerit assigiinngitsut aqqaneq-marluk novembarimi decembarimilu ingerlanneqarnissaat pilersaarutaasoq.

Maannali paasinarsivoq Qaasuitsup Kommuniata pikkorissartitsinissaminut nunaqarfimmiut peqataanissaat mattuteqqangaa:

- Assorujussuaq nunaqarfimmiuulluni nakeriallannarpoq. Aappaatigullu aamma kommunimut akileraaqataagatta, taavalu immikkoortitaalluta.  Qaleralittassaqannginnattalu qanoq-iliuusissamik utaqqiusaartugut, taamatut sanimut ajanneqarnerput assorujussuaq nakeriallannarpoq, Hans Nielsen, Qaarsuni aalisartut piniartullu peqatigiiffianni siulittaasoq oqarpoq.

Ikiueqqaarnermut radiolerinermullu pikkorissartitsinerit novembarimiit decembari ilanngullugu ingerlanneqarnissaat kommunimit pilersaarutigineqarpoq. Taakkuuppullu nunaqarfimmiut pikkorissaqataaffigerusullugit soqutigisaralui.

- Nunami pikkorissarnissat tamakkua peqataaffigerusukkaluaratsigit. Aamma imarsiortuulluni ikiueqqaarnerit soqutiginartorujussuugamik. Nunaqarfimmiuulluta aamma uagut pisariaqartikkaluarpagut tamakkua pikkorissarfiginissaat, illoqarfimmiuinnaanngitsut, Hans Nielsen oqarpoq.

Ikiueqqaarluni pikkorissartitsinerit aammalu radiolerilluni, GMDSS SRC-tut taasamut, pikkorissartitsinerup ataatsip ingerlanneqarnera 100.000 koruuniniit 150.000 koruunit tungaanut naleqarpoq. Radiolerinermut pikkorissartitsinerit Upernavimmi, Uummannami Ilulissanilu ingerlanneqassapput. Illoqarfikkaartumik 15-init peqataaffigineqarsinnaasut.

Ilanngutassiap suliarinerani Qaasuitsup Kommuniani pikkorissaatitsinermut akisussaasunik oqaaseqartitsiniaraluaratta iluatsinngilarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq