Illoqarfiit marluk palaseqanngillat
Pikkorissaasussat tassaassapput ilagiinni sullissisut, aamma inunnik isumaginninnermik sullissisut. Taakku isorliunerusuni palasit kiserliortaqisut sakkussaannik tuniniarlugit pikkorissassavaat.
Palasissaaleqineq qanoq iliuuseqarfiginiarneqarnersoq Aleqa Hammondimit paragraf 37 naapertorlugu apeqqutigineqarmat, suliniutit suunersut Naalakkersuisup Palle Christiansenip nassuiaassuteqarfigigamigit ilaatigut taama akivoq.
Kangaatsiaq Illoqqortoormiullu palaseqarfiini massakkorpiaq palaseqanngillat. Illoqqortoormiullu qanittukkut palasitaarnissaat ilimananngimmat ajoqissarsiorluni Tasiilami allagartaliisoqarpoq, ajoqillu palasip Illoqqortoormiuni suliassai isumagisalissagai eqqarsaatigineqartoq, Palle Christiansen oqarpoq.
Aamma pikkorissaanissap saniatigut ilagiinni allaffissornikkut sullisseriaatsit eqaallisarneqarnissaat siunniunneqarluni maleruagassanik nutarterisoqartoq Palle Christiansenip ilanngullugu oqaatigaa, taamaaliortoqarneratigullu oqaluffinni sulinissap pilerinarsarneqarnissaa siunertarineqartoq aamma oqaatigalugu.
- Suliniutit siuliani taariikkatta saniatigut Nunatsinni ilagiinni palasitut ilinniagaqartarnerup qanoq pilerinarsarneqarsinnaanera pillugu ujartuisussamik suleqatigiissitaliamik Naalakkersuisut aamma pilersitsitsipput, palasillu naammattut siunissami naammassisalernissaat tassuunatigut qulakkeerniarneqassalluni, Palle Christiansen Aleqa Hammond-ip apeqqutaanut akissuteqarnermini ilaatigut taama allappoq.
