Illoqarfiit ataasiakkaat nukittorsarneqarnissaat pissusissamisoorsoraa
Illoqarfiilli ataasiakkaat nukittorsarneqarnerat nunaqarfiit atugarissaarnerannik eqquissanngilaq. Margrethe Sørensen, inooqatigiit pissusaannik ilisimatusarsimasoq taama oqarpoq:
- Nunaqarfinni isorliunerusunilu atugarissaarnerup aamma qaffasissuunissaa pissusissamisoorpoq, tamaanimi innuttaasut illoqarfinnut eqiteruffiusunulluunniit noorusussuseqarnerulersinnaassammata. Inuimmi illoqarfinnut nukittorsarneqarsimasunut noorusussuseqalerpata tamaani suliffissat piffissaq ungasinnerusoq eqqarsaatigalugu pilersinneqassammata, Margrethe Sørensen, inooqatigiit pissusaannik ilisimatusarsimasoq, taamanikkut Namminersornerullutik Oqartussani ukiut 30-t sinnerlugit sulisimasoq oqarpoq.
Taanna nunaqarfiit taakkunanilu ataqatigiinnermut aaqqissuussinerit immikkut aallutarisimavai, siunnersortitullu namminersortutut maanna sulilluni.
Illoqarfinni nunaqarfinnilu innuttaasut tamarluinnaasa atugarissaarnerunissaannik eqqarsarnerup angujuminaanneranut Nunatta isorartunersuata pilersippaa, taamaammallu Nunatsinni illoqarfiit ilaat nukittorsarneqartariaqartut, Nunani Avannarlerni eqqarsaqatigiit sapaatip-akunnerata siuliani taama isumaliutersorput.
- Nunani Avannarlerni nunat innuttaasa siunissami atugarissaarnissaat anguneqassappat, taava illoqarfinnik ataasiakkaanik nukittorsaanissaq pingaaruteqarpoq, Eqqarsaqatigiit ilaatigut inerniliuppaat.
Nunaqarfinniit illoqarfinnut nutsertut ukiuni kingullerni ikiliartoratillu amerliartunngitsut, Margrethe Sørensenip oqaatigaa, nunaqarfiilli inuerukkiartortillugit tamaani atortulersuutit sullissinerillu aamma naammattusaarneqartariaqartut, Margrethe Sørensenip oqaatigaa:
- Nunaqarfinni isorliunerusunilu ataasiakkaani inuerukkiartorneq ilutigalugu pisortat sullissinerat annikilliartuaartinneqartariaqassaaq, assersuutigalugu innaallagissamik pilersuinermi elværkit angivallaannginnissaat eqqarsaatersuutigineqartariaqarmat, aningaasartuutit taamaalillutik amerlavallaannginniassammata, soorlu aamma ilinniartitaanermi, peqqinnissaqarfimmi inunnillu isumaginninnermi suliat annikillisarneqartariaqassasut, Margrethe Sørensen, inooqatigiit pissusaannik ilisimatusarsimasoq, KNR-imut oqarpoq.
