Illoqarfiit anginerit inissianik sanaartorfiunerpaassapput
Illoqarfiit annerit sisamat sanaartorfiginissaat pingaarnersaavoq, ilaatigut realkreditimit taarsigassarsinikkut aningaasalersorneqartussanik.
Nuummi inissaaleqisoqarnerpaaffiusumi inissialiortiternissaq pingaarnerpaatut taakkartorneqaraluartoq, Sisimiut, Ilulissat Qaqortorlu aamma pilersaarusiorfigineqassapput. Utaqqisut qasserpiaaneri misissuiffigineqassapput, maannakkummi initaarnissamut qinnuteqarsimasut 2.190-it Namminersorlutik Oqartussani utaqqisutut allattorsimasuutaapput. Allattorsimaffimmi utaqqisut ima amerlatigaat, allaat initaarniartut ukiuni arfineq-marlunnit 14-inut utaqqisinnaasarlutik.
Nuummi inissiarsuit amerlaqaat aserfallalluinnarlutillu isatertariaqalersimasut. Taamaammat sanaartorneq tuaviuuttariaqarpoq. Piginneqatigiilluni aamma nammineerluni pigisanik inissialiortiternerup saniatigut, inissiat tamanit attartorneqarsinnaasut sananeqartariaqartut akisussaqaat, taamaammat Ingerlatseqatigiiffik Illuut A/S, Namminersorlutik Oqartussanit tamakkiisumik pigineqartussaq, pilersinneqassaaq. Tamanit attartorneqarsinnaasunik inissialiorneq siullermeerluni realkreditimit taarsigassarsinikkut aningaasalersueqataaffigineqassaaq. Kommunit Namminersorlutillu Oqartussat taamaalillutik sukkanerusumik sanaartortitsisinnaalissapput.
Naalakkersuisut aningaasanut inatsisissatut siunnersuumminni aappaagumiit ukioq 2015 tikillugu Nuummi inissianik 963-inik sanaartortitsinissaq pilersaarutigaat, nunatta avataaneersunit aningaasaleeqataaffigineqarnermigut 1,1 milliardi koruuninik akeqartussamik.
Nuup ilaani Qinngutsinni inissianik 300-nik sanaartornissat decembarip ulluisa 18-ianni suliariumannittussarsiuunneqassapput. Blok P-eersuup 135-inik inissiallip isaterneqarneranut atatillugu inissiat ilaat 98-it nuuttussanut inissatut immikkoortinneqassapput.
Blok P sisamanut avillugu isaterneqassaaq, peqatigitillugulu Kommuneqarfik Sermersuup Blok P-p kitaani Tuujummi ineqarfiit 122-it nutarternissaat aallartinneqassasoq aalajangiuppaa. Radiup Qaqqaani nutarnerinerit aamma 2012-imi aallartinneqassapput. Taakku saniatigut ilinniartut inissaannik 42-inik sanasoqassaaq.
