Illersornissamut qullersaqarfik Issittumi suliaminik annertusaasoq
Sorsuut, rakettinik igeriussissutinik qamutilinnillu assigiinngitsunik atortorissaaruteqartoq, sakkutuut imarsiortut umiarsuaasa ataatsimoortut naalagaata issimaffissaasa ilagaat. Taanna Issittumi Sakkutooqarfiup suliaminik naammassinninniarnerani killiffianik pingaartumik ullumikkut malunnartitsisuuvoq. Sermitsiaq.AG taama allaaserisaqarpoq.
Umiarsuaq sorsuut umiarsuit alapernaarsuutit ilisimaneqartut peqatigalugit Savalimmiuni nunatsinnilu nakkutilliinermik oqartussaaffiginninnermillu takutitsinermi suliaqarnermi ilaalerpoq.
- Sorsuutip Atlantikup avannaani Kalaallit Nunaatalu eqqaanut inissinneqarnera Illersornissaqarfiup Issittumi nukittorsarneqarnissaanik Danmarkimi partiit amerlasuut kissaataasa takussutissartaraa, Issittumi Sakkutooqarfik Sermitsiaq.AG-mut ilisimatitsivoq.
Radarit silaannartamik nakkutilliinermut pitsaanerusumut tapertaapput. Tamatuma saniatigut umiarsuup sorsuutip illersornissaqarfiup qulimiguuliutaa nutaaq MH-60R Seahawk nassataraa.
- Umiarsuaq sorsuut aamma sakkutuujunngitsut suliaannik suliaqarnermut soorlu ujaasinernut, annaassiniarnernut kiisalu umiarsuarnut allanut ingiaqatiginninnermut ilaasinnaavoq, Issittumi Sakkutooqarfik ilisimatitsivoq.
Umiarsuaq sorsuut 28 knobimik sukkatigisinnavoq, 9.000 sømilinik, tassa 16632 kilometerinik, isorartutigisumik orseqqaarani angalasinnaalluni.
Aviisi Jyllands Posten naapertorlugu sorsuutit pingasut suli naammassinngitsiartulli isornartorsiorneqartarsimapput, sorsuutimmi pineqartut issittumi sikusiorsinnaanngillat,
- Tamannali ajornartorsiutaanavianngilaq aamma Danmarki allanik alapernaarsuutinik sikusiorsinnaasunik peqareerpoq, sakkutuut imarsiortut naalagaasa ilaat taama oqarpoq.
