MISISSUEQQISSAARNEQ: Illersornissamut qullersaqarfik Issittumi sipaarniuteqassasoq
Illersornissamut qullersaqarfiup aningaasaqarnera pillugu missingersuutinik misissueqqisaarnermi, Danmarkimi tusagassiuutip OLFI-p saqqummiussaani, siunnersuutigineqartut ilaat taama oqaasertaqarpoq.
Danskit naalakkersuisuisa Illersornissamut qullersaqarfiup ukioq 2018-imit ukiumut ikinnerpaamik 950 millionit koruunit nalinginut pisariillisaavigineqarnissaanut siunnersuuteqaqqullugit, siunnersuisarfittut suliffeqarfiit marluk, Boston Consulting Group aamma Struensee & Co., ukioq manna siusinnerusukkut suliakkerpaat.
AAMMA ATUARUK Aaja: Illersornissaqarfik aningaasanik amerlanernik pisariaqartitsivoq
Misissueqqissaarnermi ilaatigut atuarneqarsinnaavoq umiarsuit alapernaarsuutit Thetisitut ittut Issittup nakkutigineqarnerani atorneqarnerisa killilerneratigut 7 millionit koruunit ukiut sisamat ingerlanerini sipaarutaasinnaasut.
Aamma umiarsuit Knud Rasmussenitut ittut sipaarniarfigineqarnissaat siunnersuutigineqarpoq, ilaatigut nunatta imartaani ullut atorneqartut ikilisinnerisigut inuttaqarnikkut aningaasartuutit sipaaruteqarfigalugit, misissueqqissaarnermi tamanna atuarneqarsinnaavoq.
AAMMA ATUARUK Illersornissaq pillugu isumaqatigiinniarnerni nunarput peqataatinneqassanngitsoq
Danskit naalakkersuisuisa illersornissaq pillugu ukiunut sisamanut siunnersuummik saqqummiussinissaat sioqqutilaarlugu misissueqqissaarneq saqqummiunneqarpoq. Isumaqatigiissuteqarnissarli, danskit naalakkersuisui naapertorlugit, Illersornissamut qullersaqarfiup "malunnaatilimmik pitsanngorsarneqarneranik" kinguneqartussaagaluarpoq.
Partiit illersornissaq pillugu isumaqatigiissuteqartut siorna decembarimi isumaqatigiissutigaat Illersornissamut qullersaqarfiup Issittumi suliassaanut ukiumoortumik 120 millionit koruunit missingersuutigineqassasut.
Danskit naalakkersuisuisa siunnersuutissaanni Issittumi illersornissakkut suliassat allanngortinneqassanersut suli nalunarallarpoq.
AAMMA ATUARUK Illersornissaqarfiup issittumi suliassai pillugit nalunaarusiaq saqqummiunneqartoq
