Peqqinnissaqarfik oqariartuuteqartoqareersorlu: Iliuuseqangaarnerat nersorparput

Portørit kattuffiata portørit amerlanerusunik suleqateqalernissaannik ilinniaqqinnissaannillu kissaateqarnerat suliassaasalu amerliartuinnarnerannik oqariartuutaat tusagassiuutini ulluni kingullerni takussaapput.

- Suliassat suli amerliartuinnartillugit amerlanerusunik suleqateqarnissarput kissaatigaarput, Kalaallit Nunaanni Portørit Peqatigiiffianni siulittaasoq Ludvig Larsen KNR-imut sapaatip akunnerani kingullermi ilaatigut oqarpoq.

Portørit suliassarpassuarminnut angummassinnaannginnerat pissutigalugu, pinartoqartillugu ilaannikkut apuuteriaannaaneq ajornerat siulittaasup oqaluttuaraa. 

Taassumallu oqarnera naapertorlugu tamanna Nuummi, suliassat amerliartornerat ilutigalugu innuttaasut amerliartorneranni, taamaallaat ajornartorsiutaanngilaq. 

- Suleqatigut sineriammiittut eqqaanngitsoorusunngilakka. Sulinerni pissutsit ullumikkut atuuttunit pitsaanerunissaat pillugu peqqinnissaqarfimmi aqutsisunut peqqinnissamullu naalakkersuisumut, Anna Wangenheimimut (D) uparuaareerpugut. 

Sulinerat nersorneqartoq

Peqqinnissaqarfimmilu aqutsisut allakkatigut KNR-ip saaffiginninnerata kingorna akissuteqarput.

- Portørit kattuffiata suliassat, sulinermut atugassarititaasut ilungersunartullu pillugit sukumiisumik nassuiaataannik pissarsinerput qujamasuutigaarput. Portørit suliaat Nuummilu sineriammilu illoqarfinni allani pissutsit pillugit pingaarutilimmik ersersitsivoq.

- Portørit  peqqinnissaqarfimmi napparsimasunut iluaqutaasumik ulloq unnuarlu sullissinerat pingaarutilik nersorparput, peqqinnissaqarfiup qullersaqarfianit nalunaarutigineqarpoq.

Portørilli amerlanerusunik suleqateqalerusunnerisa saniatigut, ikiuinerusinnaajumallutik ilinniaqqinnissartik ujartorpaat.

- Ullumikkut pisariaqartinneqartunut naleqqunnerusumik ilinniaqqinnissatsinnut periarfissarsiorpugut. Pinartoqartillugu ikiuilluarsinnaanerulerumalluta atortorissaarutigullu atorluarsinnaanerulerumallugit ilinniaqqikkusuppugut, Ludvig Larsen KNR-imut oqarpoq.

Kalaallit portørii nunani allaniittunut sanilliullugit pinartoqartillugu katsorsaatit atorlugit ikiuinissaminnut killilimmik piginnaatitaapput.

- Assersuutigalugu anniartunut nipaallisaatinik nakorsaasersueqqusaanngilagut. Morfinimik nipaallisaasersueqqusaanngilagut. Inunnut noqartunut Stesolidimik nakorsaasersueqqusaanngilagut. Sukkortunut Stesolidimik aamma nakorsaasersueqqusaanngilagut.

- Taakkua tassaapput katsorsaariaatsit nakorsaariaatsillu annikinnerit ingerlaannaq nakorsaataasinnaasut, taamaaliornissamulli akuersissuteqanngilagut.

Portørit kissaataat oqaaseqarfigineqanngitsut

Aqutsisoqarfiup portørit kattuffiata kissaatai KNR-imut akissutimini oqaaseqarfiginngilai. Aqutsisoqarfiulli akissutimi naanerani allappoq, 'portørit kattuffiata saaffiginnissutaa maanna misissorlugu kattuffimmullu tamatuma kingorna saaffiginnikkumaarlutik'.

Tamanna Ludvig Larsenip nunatsinnilu portørit sinneri 69-iusut ilinniaqqinnissaannut periarfissinneqarnissaannik kinguneqassanersoq suli nalunarallarpoq.