Ilitsersuisartut filmiliassaminnut inuttaasussarsiortut
Filmiliaritittussat pingasut pissarsiarineqarniarput, Otto Rosingip Torben Bechillu filmiliarisassaannut "Palasi"-mut misilitsittoqassalluni.
Otto Rosing Torben Bechilu kingullermik filmilioramik filmi "Nuummioq" 2009-mi suliaraat.
"Palasi" Maariumut tunngasuussaaq. Taanna 50-it qiteqqunneranni ukioqaraluarluni ataatamini suli najugaqarpoq. Maariu ajorunnaarsaasartuuvoq, tassa healeriulluni. Assersuutigalugu inuk anniaateqarpat assani inummut taassumunnga inissikkunigit inuup anniaatai peersissinnaavai. Angutaa palasiuvoq, Maariullu piginnaasai nuannarivallaarnagit. Maariusilli qatanngutaa qatanngutimi piginnaasai iluaqutigalugit aningaasarsiorniarsarisarpoq.
Maariusip niviarsiaraq qulinik ukiulik Pipaluk ikinngutigaa, aalisariaqatigisarlugulu. Pissutsilli taamaattuaannassanersut apeqqutinngorpoq, namminerlu ingerlariaqqissinnaassanersoq apeqqutaalerluni.
Tassa filmimut "Palasi"-mut peqataarusussinnaassaguit misilitsinnermut oktobarip 30-anni ornigutiinnassaatit.
Inuit pingasut pissarsiariniarneqarput, tassaassallutillu:
Pingaarnertut inuttaasussaq Maariu. Angut 50-it sinnerlugit ukiulik, inussiortuunngitsoq matoqqasorlu. Nerisassallu sassaalliutigineqartut suugaluarpata nerisarai.
Maariup qatanngutaa. Inuk inussiarnersoq ammasorlu. Aningaasarsiorfigisinnaasaminik ujartuisoq, oqaluttuallaqqissorlu.
Pipaluk. Niviarsiaraq qulingiluat qulillu missaanni ukiulik. Inequnartoq nammineersinnaassuseqartorlu.
Uani paasisaqarnerugit: www.palasimovie.com
