Ilisimatuut 22-t Nuup kangerluani misissuiartorlutik ullumi aallarput
Ilisimatuut 22-t umiarsuarmi ilaasut sapaatip-akunnerini pingasuni paarlakaajaallutik ulloq unnuarlu sulisassapput.
Immami avatangiisit misissuiffigineqassapput, ingammik uumasuaqqat isaannarmik takuneqarsinnaanngitsut misissuiffigineqassallutik
Ilisimatuut 22-t nunanit assigiingitsuneersut umiarsuarmi Danami angalaqataapput. Sikup aakkiartornerata immallu kissarnerulernerata kingunerisaanik immamut sunniutai misissufifigineqassalluni, ilisimatuussutsikkut misissuinermi aqutsisoq professor Torkel Gissel Nielsen oqarpoq.
Immap qanoq nillertiginera uuttortarneqassaaq aammalu qanoq tarajoqartiginera missuiffigineqassaaq aammalu aalisakkat immamilu uumasut tigusiffigineqassapput, tassuunatigut paasiniarneqassalluni immap nillissusiata allanngorneratigut immami uumasunut sunniutai, Torkel Gissel oqarpoq.
Immami uumasut isaannarmik takuneqarsinnaanngitsut qallunaat planktonimik taaneqartartut misissuiffigineqarnissaat ilisimatuunit soqutigineqarneruvoq.
Immami uumasut isaannarmik takuneqarsinnaanngitsut immami uumasut nerisassaqarniarnerannut tunngaviliisuupput, peqquit taakkuninnga nerisaqaramik, peqquillu aalisakkanit nerineqartarput, aalisakkallu puisinit uumasunillu allanit nerineqartarlutik, Torkel Gissel oqarpoq. Uumasut isaannarmik takuneqarsinnaanngitsut avatangiisiat allanngorpat, soorlu imaq kissarnerulerpat taakkununnga immamilu uumasunut allanut sunniuteqassaq, soorlu Kalaallit Nunaani inuussutissarsiutitut pingaarutilimmik inissisimasut aalisakkat uumasullu miluumasut eqqorneqassapput, taamaattumillu uumasut isaannarmik takuneqarsinnaanngitsut missisuiffigineqarnissaat soqutigivarput Torkel Gissel Nielsen suleqatitsinnut Lille Marie Nielsenimut oqarpoq. Silap pissusaata allanngorneratigut kingunerisaasa uppernarsarlugit takussutissaqarnissaat pingaaruteqartoq Torkel Gissel Nielsen oqarpoq, tamakku tusaanarneqaratik oqaluuserineqaannaratillu uppernarsaateqarnissat Torkel Gisselip pingaaruteqartoq oqaatigaa.
Kalaallit Nunaanni ilisimatuussutsikkut misissuinissat soqutigineqartorujussuupput, allaat umiarsuup Danap Nuup kangerluanut angalanissaanut peqataajumallutik nalunaartut amerlangaarmata, peqataajumallutik nalunaartut ilaat utaqqisuniittariaqarsimallutik, Torkel Gissel Nielsen oqarpoq.
