Ilisimatuup Kinamiut qalliunerulersinnaanerat mianersoqqussutigaa
Nunarput aatsitassanik qaqutigoortunik, aatsitassanillu allanik soorlu kuultimik saviminermillu peqarnera Kinamiunit soqutigineqartorujussuanngorsinnaanissaa ilimagineqarsinnaavoq.
Aatsitassanik qaqutigoortunik piiaanermi niuernermilu Kina ullumikkut kisermaassingajattutut inissisimavoq, Nunattali aatsitassanik qaqutigoortunik assersuutigalugu Kuannersuarni ukiut marluk qaangiuppata piiaalissappat, aatsitassanik qaqutigoortunik niuernermi Kalaallit Nunaat pingaarutilittut inississinnaassaaq, taamalu Kina unammillissallugu.
Kalaallit Nunaata Danmarkimut, EU-mut Nunallu Killiit Illersoqatigiiffiannut NATO-mut qaninnerusumik taamaammat suleqateqarnissaa pingaaruteqartoq, Damien Degeorgesip ilisimatuutut misissuinerminut atatillugu oqaatigaa.
Ilisimatuut issittumut tunngasunut aallutaqartut attaveqaqatigiiffiannut taanna ilaasortaavoq:
- Nuna 57.000-iinnarnik inulik, politikerinillu nuimasunit katillugit 44-nit taamaallaat aqunneqartoq qajannartuuvoq. Isumaqatissarsiortuniillu sunnertiasoorujussuusinnaallutik, Damien Degeorges atuagassiamut Ingeniørenimut oqarpoq.
Kalaallit Nunaata naalagaaffeqatigiinnermiiginnarnissaa taassuma innersuussutigaa:
- Kalaallit Nunaata namminersulivinnissaq pillugu ilungersornini unitsikkallartariaqarpaa, imaluunniit siunissaq eqqarsaatigalugu kigaatsumik anguniartariaqarlugu, Degeorges oqarpoq.
Kalaallit Nunaata aningaasarsiornikkut ukiut tulliuttut qulit 30-illu akornanni ineriartornissaa eqqarsaatigalugu politikkikkut peqqissaartumik aqunneqarnissaanut Degeorgesip oqariartuutaa, Ilinniartitaanermut, Ilisimatusarnermut Nunanullu Avannarlernut suleqateqarnermut naalakkersuisup Palle Christiansenip isumaqatigaa, NATO-millu suleqateqarnerunissaq taamaammat mattunnagu.
- Umiarsuarnimmi alapernaarsuutinik nammineq peqanngilagut, taakkuummata imartatsinnik nakkutilliisussat. Danmarkimik, Nunanillu Avannarlernik allanik NATO-millu suleqarnerunissarput taamaammat pingaaruteqarpoq, Palle Christiansenip erseqqissaatigaa.
