Ilisimatusartoq: Nunaqarfinni tunisassiortut taperserneqartariaqarput

Taama isumaqarpoq Kåre Hendriksen, nunaqarfiit ingerlanneqarnerisa illoqarfinnut sanilliullugit akisuneruneruneqartarnerannut isummersimanermut ilisimatusarnermi kingorna 2012-mi allatut inerniliisimasoq.

Najugaqarfinni mikinerni ineriartortitsineq pillugu ataatsimeersuarnerup ulluata aappaa aallarnerlugu inuussutissarsiutit aamma isumalluutit uumassusillit ullumi sammineqarput.

Sammineqarneranni ilaatigut KNT A/S kalaaliminernik nunatta iluani tunisasiortuusoq nunaqarfinni namminersorluni tunisassiorfinnik aallartitsissagaanni suut piumasaqaataanersut saqqummiussaqarpoq.

Kisianni tunisassiorfinnik nunaqarfinni iluatsittumik ingerlatsissagaanni pissutsit assigiinngitsut pingasut ataqatigiisillugit suleqatigiisinneqartariaqarput. Taama isumaqarpoq Kåre Hendriksen: 

- Taakkua pingasut suleqatigiilluarpata: Inuit, tunisassiassat nunaqqatigiillu inuiaqatigiinnit tapersersorneqarnerat, taava nunaqarfippassuit ingerlalluarsinnaapput. Taamaalillutik aamma imminnut pilersulersinnaapput meeqqallu ilaannut perortitsilluarlutik, Kåre Hendriksen, nunaqarfinni siunissami periarfissat pillugit ilisimatusarluni misissuinermini inerniliussimasaminik ippassaq saqqummiussisoq taama oqarpoq.

Taannalu KNT A/S-imit, maanna Niaqornani Qaarsunilu tunisassiorfimmik ingerlatsisumit taperserneqarpoq:

- Tassa ilumoorluinnarpoq. Tassa suliffeqarfik nunaqarfimmi sumiikkaluartumiluunniit ingerlanneqartoq kiisalu nunaqarfimmiut namminneq ataatsimoorlutik tapersersuinissaat, kiisalu aamma ingerlaqqinnermi - minnerunngitsumik niuernerup tungaatigut - inuiaqatigiit aamma tapersersuinissaat pingaartupilorujussuuvoq, Mikael Petersen, KNT A/S-imi pisortaq oqarpoq nangillunilu:

- Tassami nalunngilarput innuttaasugut Kalaallit Nunatsinni, minnerunngitsumik nunaqarfinni najugallit eqqarsaatigalugit, aningaasat tigoriaannaat annertoorsuit pigineqanngillat. Aningaasaatikittuuvugut nammineq pilersitatsinnik. Taamaattumik pisuussutitsinnik aningaasat amerlanerusut kaavitittalerniarutsigit aammalu pigilerniarutsigit inuiaqatigiinni, taava pisariaqarpoq taakkua pingasoqiuasat imminnut suleqatigiilluarnissaat tapersersoqatigiillutik, Mikael Petersen oqarpoq.

Kåre Hendriksen isumaqarpoq nalilersuisariaqartugut suna pitsaanerunersoq. Inuiaqatigiit suliffissarsiortunut ikiorsiissutinik tunioraarusaarnerat imaluunniit nunaqarfinni tunisassiorfinnut tapiissuteqarneq?

- Tunisassiorfiit sinneqartoorlutik ingerlasariaqarnerannut isummersorneq pivallaarnagu, inuiaqatigiinnut iliuuseqarnertut qiviarsinnaavarput. Suna pitsaanerua? Illoqarfinni suliffissarsiortunut ikiorsiissutinik tunioraaneq imaluunniit nunaqarfinni tunisassiorfinnut tapiissuteqarneq, taamaalilluni innuttaasut imminnut pilersorsinnaatilerlugit tapiissuteqarfigilaarnerisigut. Taamaammat sinneqartoortoqartariaqarneranik oqartarneq ulorianartoqarpoq aamma, Kåre Hendriksen oqarpoq nangillunilu:

- Aamma eqqaamasariaqarparput nunatta iluani tunisassiortut Europami naasorissaasunut tunisassiornerminni EU-mit aningasarpassuarnik tapiissutisisartunut unammillermata. Taamaalilluni unammilleqatigiinneq equngavoq. Taamaammat aamma nunatsinni tunisassiortunut tapiissuteqartariaqarpugut, taamaaliunngikkuttami iluatsissinnaassanngimmata, Kåre Hendriksen oqarpoq.

KNT A/S saqqummiinerata saniatigut Realdaniap Ilimanami suliniutini pillugu aamma saqqummiussaqarpoq.