Ilisimatusarnermi nutaami misissorneqassaaq nunatsinni uummallunnermik nappaateqarneq qanoq siammasitsiginersoq.Assi: Alex Poimos/Flickr Creative Commons

Ilisimatusarneq nutaaq: Nunatsinni uummallunneq misissorneqalerpoq

Kalaallit Nunaanni innuttaasut akornanni qanoq amerlatigisut uummatimikkut tillertoornermik akornuteqarnersut nutaamik erseqqissaassummik ilisimatuussutsikkut misissuisoqalerpoq, ullumikkummi tamatuma Kalaallit Nunaanni ilisimaneqarnera killeqaqaaq, ilisimatusarnermut aqutsisussaq Nadja Albertsen oqarpoq.

Nuummi nutaamik ilisimatuutut misissuinermi siunertaavoq, kalaallit akornanni uummatip tillernerata misissuiffigineqarnissaa.

Ilisimatuutullu misissuineq taanna Aalborgip Universitetshospitaliani aammalu nunatsinni Ilisimatusarfimmi suliarineqassaaq. 

Misissuinermi erseqqissumik paasiniarneqassaaq Kalaallit Nunaanni inuit qanoq amerlatigisut uummatimikkut tillertoornermik akornuteqarnersut tamannalu eqqumaffigineraat.

Taamaattumillu Ph.d.-mut ilinniartup Nadja Albertsenip misissuinermilu qitiusussap Nuummi najugallit inersimasut 50-t sinnerlugit ukiullit misissuinermut peqataarusussinnaasut pissarsiariniarpai.

- Uummatip tillernera nalinginnaasoq qanoq tillertartoq tamatta nalunngilarput, uummatilli tillernera akornuteqarsimappat taava akuttoqatigiinngitsumik tillissaaq. Amerlanertigut eqqissisimalluinnartumik tamanna pisaraluarpoq, tamannali ilaanni taqqatigut milittoortitsisinnaasarpoq, taamaalisoqartillugulu aak ingerlaartoq qaratsamut ingerlasarpoq, Nadja Albertsen oqarpoq.

Ilisimassallugu pingaarpoq

Uummatikkut tillertoortarnerup ilisimaarinissaa pingaartuuvoq, tamannali kalaallit akornanni ilisimaneqarnera killeqarpoq, Nadja Albertsen nassuiaavoq. Uummatikkut tillertoornermik akornuteqalerneq ukioqqortusiartornermi ingammik atuuttarpoq, kalaallillu akornanni taamatut nalaataqartartut ukiumikkut agguaqatigiissinneranni takuneqarsinnaavoq amerliartortoqartoq.

- Utoqqaliartornerput ilutigalugu uummaterput tillernerulersarpoq. Nappaatit inooriaatsimi aallaavillit soorlu sukkorneq aakkullu qaffattoorneq kalaallit akornanni uummalluttunnguutaasarput, taamaalisoqartillugulu uummatip tillernera sukkatsittarpoq, Nadja Albertsen oqarpoq

AAMMA ATUARUK Umiarsuaq ilisimatusaat nutaaq nunatsinnut siunissami iluaqutaassasoq

Uummatip tillertoortarneranik akornuteqartilluni pinartunut ilaavoq qaratsakkut taqqatigut milittoortoqarsinnaasarmat taamaalillunilu utoqqalinerup nassataanik demenseqalernissamut qanillattortoqalertarluni tassa qaratsakkut silakillisutut pissuseqaat qanillisarluni, Nadja Albertsen oqarpoq.

Taamaammanuna uummatikkut tillertoortarneq pillugu qaammaasaqarnerunissaq pisariaqartoq.

- Inuit qaratsamikkut qaqqamikkut mililttoorsimasut isigigaanni, arlaqaqisut uummatip tillerneranik akornuteqarsimasuusarput. Napparsimavimmut uneqqaarneranni uummatikkut akornuteqarnikkut nappaat suussusersineqarsimasariaqanngilaq aammalu malugineqarsimasarnani, Nadja Albertsen oqarpoq.

Kisianni aamma inoqartarpoq, uummatimikkut kassuttoortaraluarlutik ajoqutigineq ajoraat, naak iluaatsutut misigisaraluarlugu.

- Taamaalilluni aamma tamanna inuunermi naleqassutsimut sunniuttarpoq, taanna oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl