Ilisimatusarneq eqqumiitsuliornerlu ataqatigiisinniarpaat

Ilisimatuussutsikkut angalanissamut suliniuteqartuupput professor Minik Rosing aamma eqqumiitsuliortoq Per Kirkeby. Atuakkiortoq nunatsinni Danmarkimilu ilisimaneqarluartoq Jørn Riel, illussanik titartaasartoq Bjarke Ingels aamma eqqumiitsuliortoq Tal R angalaqataapput.

Ilisimasassarsiorlutik angalasut ornitaat tassaapput, tunup avannaani nuna eqqissisimatitaq qeqertap Ella Ø-p eqqaaniittoq, kangerluit Kong Oscar aamma Kejser Franz Josephip kangerlua.

Angalanerup siunertaraa, issittumi ilisimasassarsiortarnermi ilisimatusarnerup eqqumiitsuliornerullu ataqatigiinnissaat. Ilisimatuussutsikkut angalaneq aalajangersimasunik naammassisaqarnissamik siunertaqanngilaq.  
Ilisimatuussutsikkut angalanermi masssakkut ingerlanneqartumi, siornatigut suliarineqarsimanngitsunik suliaqarnissamik periarfissiivoq.

Sumiiffiit siornatigut allanit tikinneqarsimanngitsut tikinneqassapput, ilisimatuussutsikkut angalasut nittartakkaminni taamatut allaaserisaqarput.

Inuunermi siullermeerluni Kalaallit Nunaannukarnissamut qaaqqusaaneq eqqumiitsuliortumut Tal R-imut siooranarsimavoq.

- Kalaallit Nunaannukarnissamut qaaqqusaallunga ilaserineqarama siooraammerujussuarpunga. Pinngortitaq imaannaanngitsoq takorloorpara, pinngortitaq taanna naaffeqanngitsuussisoq, Tal R oqarpoq,

Tal R angalaqataanissamut neqeroorfigineqarluni aperineqarami ingerlaannaq akuersivoq. Tal R Danmarkimi eqqumiiitsuliortut akornanni tusaamasaanerit ilagaat.

Eqqumiitsuliortut ilisimatuullu tunup avannaanukarlutik Københavnimit juulip ulluisa qulingiluaanni aallarput, Københavnimut utissallutik oktoberip ulluisa qulingiluaanni.