Ilisimatusarfimmiut: Eqqissilluta ilinniarsinnaaqqilerpugut

Ilisimatusarfiup rektoria, Tine Pars, aqutsinermut instituttimi studianævni atorunnaarsillugu aqutsisoqatigiinnik pilersitsereersorlu, insituttimi eqqissiimisoqarnissaa, Kisap siulittaasuata Avijaja Absalonsenip neriuutigaa.

Pia Vedel Ankersenip ilinniartitsisutut tunuarnera aallarnerlugu Ingerlatsinermut insituttimi pissutsit pillugit oqallittoqangaatsiarpoq, tusagassiuutitigut aamma sammineqartumik.

Tusagassiuutitigut saqqummiunneqartut aqqutigalugit pissutsit ilisimasaqarfigalugit, Ilinniartut peqatigiiffiata siulittasuata erseqqissarpaa.

- Pissutsit taamaakkallartillugit iluaraakka, ajornartorsiummi suliarineqalermat, Avijaja Absalonsen oqarpoq.

Ingerlatsinermut instituttimi ajornartorsiutit tusagassiuutini sammineqarnerat Avijaja Absalonsenip uggoraa, allaanerusumik aaqqiisoqarsinnaagaluarmat.

Instituttimi ilinniartitsinerup qaffasissusia oqallinnermi apeqquserneqartut ilagaat. Tamannalu aallaavigalugu Ilisimatusarfimmi ilinniartunik oqallitsitsinissaq, Kisamit pilersaarutigineqarpoq.

Ilinniarnermut atatillugu ilikkagassatut naatsorsuutigisat ataatsimiinnermi oqaluuserineqassasut, Avijaja Absalonsenip ilanngullugu oqaatigaa.

- Tassami Ilisimatusarfimmi ilinniarnerup pitsaasusaata nunani allani ilisimatusarfinni iliniakkanut assigusunut nallersuunneqarsinnaanissaa ilinniartuusugut tamatta naatsorsuutigigatsigu, Kisap siulittaasua Avijaja Absalonsen oqarpoq.

Kisap ataatsimiititsinissaa qaqugu pissanersoq, suli aalajangerneqanngilaq.