Ilisimatooq: Trumpip naapinnera peqqusiileqinassagaluarpoq
Trumpip Danmarkimut septembarip aappaannit pingajuannut tikeraarnissaraluaminik nittartakkatigut attaveqaqatigiittarfikkut nalinginnaanngitsorujussuarmik taamaatitsiinnarpoq. Tikeraarnissaminik taamaatitsiinnarnera danskit kalaallillu politikeriinit assigiinngitsorpassuarnik sakkortuunik qisuariarfigineqarpoq, Trumpilli Kalaallit Nunaannik pisinissamut pilersaaruteqarneranik samminnittoqartillugu taamaatitsiinnarneq pitsaanerpaatut aqqutissaagunarpoq.
Naalakkersuisut siulittaasuat Kim Kielsen, ministeriuneq Mette Frederiksen USA-llu præsidentia Donald Trump piffissami matumanerpiaq naapikkaluarpata naapinnerat peqqusiileqinartorujussuussagaluartoq, illersornissamut ilinniarfimmi lektori, Jon Rahbek-Clemmensen naliliivoq.
AAMMA ATUARUK Aki-Matilda Høegh-Dam: Præsident Trump nunatsinnut tikilluaqqusaavoq
- (Danmarkip, Kalaallit Nunaata, USA-llu aaqq.) attaveqatigiinnerannut unammillernartorujussuullunilu iluaqutaanngilaq. Naapikkaluarunik peqqusiileqinartorujussuussagaluarpoq, lektori oqarpoq itisiliillunilu:
- Ingillutik Kalaallit Nunaanik piserusunnera oqaluuserissagaluarpaat tassanilu Kim Kielsenip Mette Frederiksenillu Kalaallit Nunaat tuniniagaanngitsoq taavalu kalaallit nammineq inuiaqatigiinni ilaanertik nammineq oqartussaaffigigaat kisimi akissutigisinnaallugu. Angusaqarfiunavianngikkaluarpoq immikkoortumimi tassani Danmark Kalaallit Nunaallu tunniutiinnarnavianngillat, taamaammat isumaqatigiinnginnermi isumaqatigiissuteqartoqarnaviarnani.
AAMMA ATUARUK Trumpip tikeraarniarunnaarnerani Danmark sukataarnerusariaqarpoq
Kim Kielsenip Mette Frederiksenillu Kalaallit Nunaata tunineqarnissaa tunineqarsinnaanissaalu ataavartumik itigartitsissutigeqattaarpaat, Trumpillu piserusunnermik nalunaaruteqarnera nunarsuarmi tamarmi oqallisaavoq.
Trumpip tikeraarnissaminik taamaatitsinera amerikamiut Kalaallit Nunaanni aningaasaliinissaanut periarfissanik ajornerulersitsinngitsoq Jon Rahbek-Clemmensen isumaqarpoq:
- Naamik, tassami atorfilittat tungaanniit tamatuma aaqqiissuteqarfiunissaanut paasinnilluartoqarpoq, Kalaallit Nunaatalu tamanna arlaatigut iluaqutigissavaa.
AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa