Ilisimatooq: Nannut takusarnissaat sungiuttariaqarpagut
Isumaqartoqartariaqanngilaq nannut amerleriarsimasut, Pinngortitaleriffimmi sivisuumik ilisimatusarsimasoq, Erik Born, nannut piniagaanerannik killilersuilernissaq Inatsisartut oqaluuserereeraallu taama qisuariarpoq.
- Silap pissusaata allanngoriartornera pissutigalugu nannut pissusaat allannguinnarsimapput, taamaammat amerlisimasorinarsinnaallutik, Erik Born nutaarsiassaqartitsivimmut Ritzauimut oqarpoq.
- Isumaqarpunga sikup milliartornerujussua nannut inoqarfinnut pisalernerinut pissutaasoq. Sikumi annikillippat nannut nunamiinnerusariaqalersarput, Erik Born nassuiaavoq. Silap pissusaata allanngoriartornerata nannut pissusaannut sunniuteqarnera taassuma qularutiginngilaa.
Taamaammat Erik Born isumaqarpoq, piviusut paasisaqarfigivitsinnagit nannut eqqissisitaanissaat nannuttassiisarnerlu allanngortittariaqanngitsut.
- Aamma isumaqarpunga, Kalaallit Nunaanni innuttaasut sungiutiinnartariaqaraat nannumik takullunilu ingerlaannaq pisarineqarnissaa pisariaqanngitsoq. Soorlu Svalbardimi nalinginnaavoq, nannut najugaqarfiit eqqannguini takussaasarnerat. Nannut qanimut inooqatiginissaat ilikkarnikuuvaat. Canadap issittortaani Alaskamilu aamma taamaappoq, Erik Born oqarpoq.
