Ilisimatooq: Korea Kujalleq Kalaallit Nunaallu assigiissuteqangaatsiarput

Nunallumi taakku marluk assigiissuteqangaatsiarput. Jong Kun Choi, Korea Kujallermi politikkikkut ilisimatuut nuimanersaasa ilaat, taama isumaqarpoq.

- Korea Kujalleq Kangiata avannaani kangiani nunatuaavoq nunasiaataallunilu nunasiaataajunnaarsimasoq. Taamaammat ilisimalluarparput nunamit allamit nunasiaatigineqarneq qanoq innersoq, Jong Kun Choi, Koreami ilisimatusarfimmi ataqqisaasumi Yonseimi professoriusoq taama oqarpoq.

Taanna sapaatit-akunnerata siuliani Nuummiippoq, Ilisimatusarfiup nunat avannarliit kangia pillugu ilisimatusarfiat NIAS suleqatigalugu Kinamit, Koreamit Japanimiillu immikkut ilisimasalinnik isumasioqatigiissitsineranut peqataajartorluni.

Nunaminni pissutsit aamma nunamik Kalaallit Nunaannut Issittumullu attuumassuteqarnerat oqaluttuaraat.

Koreallu ukiorpassuarni Kinamit kingornalu Japanimit nunasiaatigineqarsimanera sunniuteqartupilussuusimasoq, Jong Kun Choi oqaatigaa.

- Sivisuumik ilungersunartumillu aqqusaagaqareerluta nunatta ineriartortittariaqarnera qanoq pingaaruteqartiginersoq nalunngilarput, taamaammat aamma Kalaallit Nunaata uatsitulli iliornissaa neriuutigaara. Korea Kujalleq inuiattut kingornussat eriagitigalugit Kalaallit Nunaata siunissaanut aatsititassarsiornerullu ineriartortinneqarnissaanut aamma ikiuussinnaavoq.

Koreap Kinap Japanillu akornanni illugiiffigisaalluni inissisimanera aamma tikkuarpaa, tamannalu Nunatsinni qanoq inissisimanitsinnut paasinnissinnaanerminnut iluaqutaanerarlugu.

- Nunat pissaanilissuit suleqatigisarneri sungiusimavarput, taamaammat korea kujallermiuusugtt kalaallillu inuiattut kinaassutsimik inerisaaniarnitsinni eriagisaqarniarnitsinnilu assigiimmik atugaqarpugut.

Jong aamma isumaqarpoq Kalaallit Nunaat Korea Kujallerlu pitsaasumik suleqatigiinnissaminnut periarfissaqarluartut. Maaniinnerminimi nerisani mamarai aammalu Kangerlussuarmut tikilluni timmisartumit anillannerminiilli angerlarsimatut tupaallaatigisaminik misigisimasimavoq.

- Kalaallit Korea Kujallermiunut assingusupilussuupput. Illoorariissimassaagut. Ilisarnaqaasi aamma kiinnasi korea kujallermiorpaloqaat.