Ilisimatooq: Aviisit kattunnerat oqallinnermik killiliineruvoq

- Aviisitoqqat kulturimik attassisut marluk kattuppata, assigiinngiiaartunik tusagassaqartitaanerup qaangiunneranik kinguineqanngitsoorsinnaanngilaq.

Pinngitsaaliissummik katinnertut taagaluaraanni, suliffinnik annaassiniarnertut

oqaatigigaluaraanni, marlunnik aaqqissuisuunneqarnikkut immikkuullarissutsinik attassiniarneq neriorsuuitigigaluaraanni, sunneeqatigiinnissaq avaqqunneqarsinnaanngilaq.

Immikkut sammisaqartarneq, unammillerneq assigiinngiiaarnerlu annaaneqassapput. ilisimatooq, oqaasilerinermut, atuakkialerinermut tusagassiuteqarnermut ilisimatusarfimmi instituttip pisortaa, Jette Rygaard, oqarpoq.

Taanna isumaqanngilaq aviisit pappialanngorlugit naqitat pisariaqassuseerussimasut, naak internettikkut nutaarsiassanik qaqugukkulluunniit ujarlersinaalernikuugaluartugut.

- Piffissaqarluarluni misissueqqissaarlunilu aviisiliorneq nutaarsiassanik pilersitsiortortarpoq, aamma internetsimut iluaqutaasumik. Tamanna nunarsuarmi allani takusarparput, maanilumi aamma takusarlugu, tusagassiutinut ilisimatooq oqarpoq.

Taassuma isumaa naapertorlugu, aviisit pisariaqassuasiat politikerit eqqarsaatigivallaarsimanngikkaat, ingammillu Nunatsinni atukkat tamaasa eqqarsaatigilluartariaqaraat isumaqarluni. Nunarujussaq inukitsoq. Arlariinnik oqaluffiusoq aningaasartornartumillu nutseriffiusartoq. Attaveqarniarneq akisooq.

- Ajornartorsiutit tamakkua politikerit aqqiiffigisariaqarpaat. Aammami Nunani allani nutarsiaqartitsitsiviit kisimiilluinnarneq ajorput, Jette Rygaard oqarpoq.

Nunani tamat oqartussaaffigisaanni aviisit qitiulluinnartartut, taassuma oqaatigaa, ilaatigut oqaatigineqartarlutik tamat oqartussaaneranni qimmiusut paarsisut.

- Tusagassiutit qimmiaraatinngortinngikkaluarlugit tapiiffigineqartarsinnaapput, tamanik eqqarsaatiginniffiusumik tusagasiuutit pillugit ungasinnerusumut iliuusissatut pilersaarusioraanni, Jette Rygaard oqarpoq.

Tamatumanilu aamma aviisit internertikkut Nunatsinni saqqummertartut amerlaqisunillu atuarneqartartut eqqarsaatigai.

- Kisianni aviisinik atuaraangatta, Tele-p iluanaarutigisarpaa. Aammami internettimik atuineq maani akisoorujussuuvoq. Aviisit nassiussuunnerannut Tele tapiissussaatineqassanersoq naluara, kisianni tamakku tamarmik ataqatigiinissaat politikerit isumaginiartariaqarpaat. Ataqatigiinngippatami nunarput tamat oqartusasaffigiunnaassavaat, tusagassiutinik ilisimatooq, oqaasilerinermut atuakkialerinermut tusagassiuteqarnermut ilisimatusarfimmi instituttip pisortaa, Jette Rygaard, oqarpoq.