Ilisimatooq: Atorfillit akuliutinngillat

- Allakkiami oqaluttuarineqarpoq, Naalakkersuisut innuttaasut nunaqarfinniit avinngaarusimasuniillu pingitsaalillugit illoqarfinnut anginerusunut nuutsinniaraat. Oqaatsit atorneqartut politikernermik taaneqarsinnaapput. Isumaqanngilanga, atorfillit Naalakkersuisut ”pinngitsaaliinermik” oqartitsissasut. Taanna kusanarnerusumik allanneqarsimasariaqaraluarpoq, Peter Munk Christiansen oqarpoq.

Tassalu kommunalbestyrelsimi ilaasortaq Ane Lone Bagger isumaqatigaa. Taanna isumaqarpoq, Qaasuitsup kommuniani atorfillit politikertut kommunalbestyrelsimut ima allakkamik:

...siunnersuut nunaqarfinni isorliunerusunilu innuttaasut ”pinngitsaalillugit” illoqarfinnut annerusunut nuutsinniarlugit naalakkersuisoqatigiit politikiannut ilaasoq”.

Kisianni pisortat ingerlatsinerannut tunngasunik immikkut ilisimasallip kommunalbestyrelsimi ilaasortaq isumaqatiginngilaa oqarmat, atorfillit politikikkut akuliussimasut.

Nukissiorfiit innaallagissamut akigititassaannik nutaanik qaffasinnerusunillu Naalakkersuisut siunnersuuteqarmata, atorfillit ima allapput:

”...nunaqarfinni innaallagissap akiata aningaasartuutinut naapertuuttunngortinnissaa kissaatigineqarpat, minnerpaamik illoqarfinni akit appariartinneqarnissaat tunuartinneqartariaqaraluarpoq."

Ane Lone Baggerip taanna narrutsaatigaa, politikikkullu akuliunnerunerarlugu.

Peter Munk Christiansen oqarpoq politikkikkut akuliunnerunngitsoq:

- Takorloortarparput, politikerit aalajangiisartuusut, atorfillillu teknikeritut sulillutik aalajangikkat piviusunngortinniartaraat. Pisortat aqutsinerannik ilisimatusarsimasugut nalunngilarput, Danmarkimiugaluarpat, USA-miugaluarpat Kalaallit Nunaaniugaluarpalluunniit taamaanngitsoq,

Taanna illuanik isumaqarpoq, atorfillit uani pineqartumi Naalakkersuisut siunnersuutaata qanoq kinguneqarsinnaaneranik kommunalbestyrelsimi ilaasortat nassuiaanniarsimagaat.

- Tassalu tamanna atorfillit suliassaraat, Aarhusip universitetiani professori Peter Munk Christiansen oqarpoq.