Ilisimatooq aalisakkanik ooqanngitsunik mamarisalinnut siunnersuutissaqarpoq
- Uumasuaqqat miluuffigisaminnut ilanngartuisartut assigiinngitsut arlaqarput, amerlanersaalli inunnut ulorianaateqanngilluinnarlutik. Ilaqarpulli millimeterinik ikitsunnguanik angissusilinnik, taakkulu alliartorsinnaapput inuullu miluuffigisap inalugaani tallingaatsiarsinnaasarlutik.
Aalisakkat nunatsinneersut assigiinngitsunik quartaasaqartarput
Nunatsinni aalisakkat quartaasanik, rundorminik, sildeorminik, torskeorminik leverorminillu akoqarsinnaasarput. Aalisakkallu ooqartinnagit nerigaanni taakku inuup timaanut pisinnaapput. Professor Kurt Buchmann uumasuaqqanik miluuffigisaminnut ilanngartuisunik ilisimatusartuuvoq, aalisakkanillu nunatsinneersunik aamma misissuisimalluni. Kapisillit, eqaluit saarulliillu assigiinngitsutigut ooqartinnagit nerisassiarineqarmata taakku aarlerinaateqarnerusut tikkuarpai.
Qullugissat aamma ilaqarput arferup puisilluunniit aqajaruanut pinermini timip iluanut siaruaakkiartortartumik. Taannalu inuup aqajaruanut pissagaluaruni, isumaqarsinnaavoq arferup puisilluunniit aqajaruaniilluni, Kurt Buchmann oqaluttuarpoq.
- Taamaalinermini aqajaqqup inalukkalluunniit amerlaasaanut pulasinnaavoq. Pingaartumillu sildeormi arlaleriarlugu aseruuttoornermik kinguneqartitsineratigut inalukkatigut annertuumik anniartitsisinnaavoq.
Peqqiilliulissagaluaruit ikiortissaqarpoq
Merianngulissutigissagaluarukku imaluunniit naarlussutigalugu meriarlutillu, taava nakorsamit quartaarsaammik pisinnaavutit. Aalisakkanik uumasuaqqanik miluuffigisaminnut ilanngartuisunik pilinnik nerineq Naalagaaffeqatigiinni maannamut toqqutigineqarsimanngilaq.
Kurt Buchmannilu aalisakkanik ooqanngitsunik mamarisalinnut siunnersuutissaqarpoq.
- Aalisagaq -20 gradeni nal. ak. 24-ni qeritikkaanni qullugiaaqqat toqunneqarsinnaapput, taamaalioreeraannilu qanorsuaq sushitugarineqarsinnaavoq.
Aalisagaq ooqanngitsoq qerititsivimmiiteqqaartaruk
Qerititsiviit amerlanersaat -14-imuinnaq imaluunniit -18-imuinnaq inissinneqarsinnaapput. Taamaammat aalisagaq ooqanngitsoq ullualunni qerititsivimmiitittariaqarpoq uumasuaqqat miluuffigisaminnut ilanngartuisut toqorarnissaat qulakkeerniaraanni, professori oqaluttuarpoq.
Kapisililli nutaaq ingerlaannaq agguararsinnarlugu wasabilerlugu sushitugarerusukkaanni allamik aaqqiissutissaqarpoq.
- Aalisakkamik ooqanngitsutorusukkuit, aalisagarlu qeriteqqaarusunnagu imaluunniit ooqqaarusunnagu, taava aalisakkap nerpia allisitsiummik misissoqqaarukku pitsaanerussaaq. Sildeormit takuneqarsinnaapput, centimeterimit ataatsimit pingasunut takissuseqalersinnaapput akimullu ersingajattuullutik, Københavnip Universitetiani professori Kurt Buchmann taama oqarpoq.
