Ilinniartut suli inissaaleqipput
Danmarkimi ilinniariarumallutik qinnuteqarsimasut juulip 30-iani akissutisisissapput. Ilinniarlertussaagaluilli arlallit inissarsisinnaanngimmata ilinniarnissartik unitsittariaqalissagaat Københavnimili ilinniartunut siunnersuisartut maanna takusinnaalereerpaat.
Danmarkimi Kalaaleqativut ilinnialertartut amerliartuinnaraluartut Københavnimi ilinniartunut inissiat ikittuinnaapput, ukiunilu kingullerni initaarumallutik utaqqisunut allattorsimasut amerlaqalutik. Pissutsit tamakku Kalaallinut ilinniagaqalerniartunut akornutaaqaat, taakkumi qallunaat ilinniagaqalerniartutuulli inissarsiortariaqartarmata.
- Inissianik tallimanik massakkorluinnaq pisariaqartitsivugut, tamatumalu saniatigut ilinniartut arlallit inissarsiortunut utaqqisunut allattorsimaffimmiillutik.
- Taakkuli tallimat eqqaariikkama akornanni ataaseq siornali ilinnialeraluarpoq, inissaaleqinerli pissutaalluni ilinniarnini ukiumik ataatsimik kinguartittariaqalersimallugu.
- Aamma allat pingasut naak ilinniarnissaminnut tiguneqareeraluartut inissaaleqineq pissutaalluni aallartissinnaanngillat.
Københavnimi Kalaallit Illuanni ilinniartunut siunnersuisoq Pia Rosing Heilmann taama oqaluttuarpoq. Taakku ilinniartut tallimat eqqaariikkavut ilaatigut inatsisilerituunngorniaavoq, akunnattumik sivisussusilimmik ilinniagartussat kiisalu ilinniariikkaminik qaffassaataasussamik ilinnialertussaangaluaq.
- Tamanna assorsuaq ugguarnarpoq, tassami taakku eqqaariikkavut ilinniarfissaminnut tigusaareeraluarput. Asulu taakku inussuttut ilinniarnissamut piukkunnarseruttornerusut piareersimagaluartullu. Taamaammat taakku ilinniarnissaraluartik unitsiinnartariaqarlugu uannut siarnutiginngikkunikku Mail-erutigigaangamikku nukillalaarnartaqaaq.
Danmarkimi illoqarfinni ilinniartoqarfiusuni tamani København inissaaleqiffiunerpaajuvoq. Odensemimi ilinniartut inissaqartinneqartuaannarput, massa Kalaallit ilinnialersussat salliutinneqartarnissaat Aarhusimi kollegianut allaffeqarfimmut isumaqatigiissusiorneqarsimasoq. Aaqqiissullumi taannarpiaq Københavnimi aamma atuutilernissaa kissaatigineqarpoq.
- Ilinniagaqarnermut naalakkersuisoq novembarimi maannga tikeraarmalli maani Københavnimi ilinniartunut inissialiortoqarnissaa imalunniit inissianik pissarsiniartoqarnissaa pillugit taamanerniilli Namminersorlutik oqartussat maani illumi pisortatta siulersuisunilu siulittaasutta qanimut attaveqarfigilerpaat suleqatigalugillu.
- Massakkorpiarli ajornartorsiutitsinnut tamanna iluaqutaavallaanngilaq.
Ajornartorsiulli ullormiit ullormut iluarsiivigineqarsinnaanngilaq, aaqqivigineqarniarneralu massakkorpiaq ingerlanneqaleruttorluni. Ajornartorsiummi taannarpiaq siornatigut annertuallaarsimanngikkaluarpoq.
Unali ajornartorsiut nuannaarutissatut tigusariaqarpoq, tassami maani Danmarkimi ilinniagaqalerumasut amerlisimanerinik takussutissaammat. Inissianilli attartortitsisartut aamma inissiaataaruttarput, taamaammallu ajornartorsiutip ajornartorsiutinngunnginnerani qanoq iliuuseqareersimasariaqarunaraluarluta, Pia Rosing Heilmann oqarpoq.
Kalaallit Danmarkimi ilinnialerumallutik qinnuteqartut siorna 400-uupput. Taakkunanngali ilaat inissaaleqineq pissutaalluni ilinniarnertik unitsiinnartariaqarsimavaat.
