Ilinniartut pisuut ilinnianermusiat qaffassavaat
- Ullumikkut ilinniartut atugaat assigiinngitsupilussuupput. Ilinniartut ilaat annertoorujussuarnik aningaasarsiaqarput. Taamaallaallu qammammut 850 imaluunniit 1700 koruunit ineqarnermut akiliutigisarlugu. Taanna allanngortinniarparput. Isertitat toqqammavigalugit kollegianut akiliisarneq annertusineqassaaq. Uani nalinginnaasunik ilinnianermusiaqarlutik atuarnerminni ingerlatsisut eqqorneqassanngillat, Ilinniartitaanermut Naalakkersuisoq Nick Nielsen oqarpoq.
Ilinniartut pisuut amerlapput
Naalakkersuisoqarfiup ilinniartut ilinniarnermi saniatigut aningaasarsiortut qanoq amerlatigisut 2011-imi misissorsimavai. Qanorlu aningaasarsiaqarnersut misissorneqarsimalluni.
Ilinniartut ukioq 2011-imi 397-iupput. Taakkunani ilinniartut 216-it qaammammut 4500 koruuninik ilinniarnermusiaqarput. Katillugit ukiumut 54.000 koruuninik ilinniarnermusiaqarlutik.
Ilinniartut ilinniarnermi saniatigut suliffillit 133-it ukiumut 100.000-iniit 200.000-it missaani aningaasarsiaqarput.
Ilinniartullu allat saniatigut suliffillit 45-it ukiumut 200.000-iniit 500.000-inik aningaasarsiaqarput.
Ilinniartut allat ilinnianermi saniatigut suliffillit pingasut ukiumut millionit affaat sinnerlugit aningaasarsiaqarlutik.
Kollegiani kisimiillutik najugallit 850 koruuninik akiliisarput. Najugaqateqartullu qaammammut 1700 koruuninik akiliisarlutik.
Ilinniartut ineqartut atugaat nammaqatigiissinniarlugit aaqqissuusseqqinnissaq pisariaqartoq, Nick Nielsen oqarpoq.
- Ilinniartut ineqarnerminnut akiliutigisartagaat taannaannaavoq oorisiaat annertorujussuugaluarpataluunniit. Taamaattumik assigiissaariniarpugut. Assigiinnerusumik ingerlatiniarluta aaqqissuusseqqinniarnerput toqqammaveqarpoq. tamatta assigiimmik nammaqatigiittariaqaratta.
Ineqarnermut akiliinerusalerpata ilinniarnermusiat qaffassapput
Ilinniartut saniatigut aningaasarsiakkaat ineqarnermut akiliinerusalerpata, ilinnianermusiat qaffannissaat anguniarneqarpoq.
- Ilinniagaqarnersiutit annertunerusunik aningaasarsiaqaruit taava kollegianut akiliisarnerit annertunerussaaq. Tassanilu annertunerusumik akiliuteqarnerni akiliutigisartakkatit ilinniagaqarnersiutit qaffanneranut aningaasalersorneqarneranut atorneqassapput.
Nick Nielseni aperaarput ilinniartut saniatigut suliffillit ilinniarnermusiat qaffannissaanut aallerfigineqarnersut.
- Isumaqarpunga taamatut oqaatigiuminaattupilussuusoq. Tassami ilinniagaqranersiutit annertussusaat tulluussagaagami. kollegiani akiliutigineqartartut. Kisianni ilinniartut aningaasarsiaat qaffasinnerujussuuppata aamma taakkua inuiaqatigiinnut sanngiinnerusunut aningaasalersuinissamut kivitsisinnaanerat eqqumaffigineqartariaqarpoq, Ilinniartitaanermut Naalakkersuisoq Nick Nielsen oqarpoq.
Ilinnianermusiat qanoq qaffanneqartigissanersut naatsorsueqqissaarnerit ingerlareerpata aatsaat aalajangiunneqassaaq.
Ilinniarnermut atatillugu qaammammut ilinniarnermusiaqarnerusartut eqqugaassanngitsut Nick Nielsenip erseqqissaatigaa.