Ilinniartut inissaqartinneqannginnerat isornartorsiorneqarpoq

Taamatulli nalunaaruteqartoqarnera, Ilisimatusarfimmi ilinniarnermut pisortap Hanne Søgaardip naammaginngilaa:

- Utoqqatseraluarpunga, kisianni taama inerniliisoqarnera ajuusaarnartutut isigaara, pipallatatullu nalilerlugu, Ilisimatusarfimmi ilinniarnermut pisortaq Hanne Søgaard Radioaviisimut oqarpoq.

Ilinniartitaanermut Naalakkersuisoqarfimmi immikkoortortaqarfimmi pisortaq Ilannguaq Nielsen oqarpoq taama aaqqiisoqartoqartariaqartoq, isornartorsiuinerli paasisinnaanerarlugu:

- Taama oqartoqarsinnaavoq, siornatigutullu iliuuserisartakkat malikkaanni, ilaqutaasullu ilagalugit inissaqartitsisarluni, taava imaassinnaavoq assersuutigalugu ilaqutaqanngitsut inissaqartinneqanngitsoortut, Ilannguaq Nielsen, Ilinniartitaanermut Naalakkersuisoqarfimmi immikkoortortaqarfimmi pisortaq oqarpoq.

Taamatulli aaqqiisoqarnera ilinniakkaminnik aallartitsisunut ajornartorsiulersitsisinnaasoq, Hanne Søgaardip aarleqqutigaa.

Ilinniartut ilaqutallit inissaqarpata ilaquttatik ilagalugit ilinnialersinnaasut, Ilannguaq Nielsenip oqaatigaa, periaatsinik sukaterisoqaannarsimanera oqaatigalugu.

Tassa imaappoq, ilinniartut ilinniakkaminnik unitsitsiinnartut aallaavigalugit inissaqartoqalerpat, taava ilinniartut ilaquttatik ilagalugit ukiamiit ilinnialersinnaassapput:

- Septembarimi oktobarimiluunniit kollegiani pisarneq malillugu inissaqarnerulertarpoq, taamaalippallu ilaquttat Nuummut nuussinnaalersarlutik, Ilannguaq Nielsen oqarpoq.

Ilinniakkaminnilli unitsitsiinnartartut aallaavigalugit inissaqartitsisoqarsinnaanera misigittaatsuliornertut, Hanne Søgaardip nalilerpaa, ilaquttallu atorfimmut atatillugu ineqartut Nuummut nuunnermikkut inigisatik annaasinnaasarmassuk aamma ajornartorsiutaanerarlugu.

Ilinniartitaanermulli Naalakkersuisoqarfimmi immikkoortortaqarfimmi pisortap tamanna aamma aaqqiivigineqarsinnaanerarpaa.