Ilinniartut ineqarfiinik sanaartornissaq pillugu KNR-ip allaaserisaanik naqqiineq

Nuummi ilinniartut ineqarfiinik sanaartornissap peerneqarnera, KNR-ip januaarip 22-ni 2025-mi allaaserisaani atuarneqarsinnaavoq.

Tamanna eqqunngilaq, tassami Aningaasaqarnermut Akileraartarnermullu Naalakkersuisoqarfik KNR-imut naqqiuteqarpoq, taanna tiguarput, naqqiummiillu issuaassaagut.

- Tusagassiorfitsinni suliat pillugit atuartoqarnerani, innuttaasut paasissutissanik eqqortunik pissarsinissaat pingaartippara. Taamaammat aamma uggorivara, KNR-i naalakkersuisunngooq kollegianik sanaartornernik taamaatitsinerarlugit allammata. Tamanna eqqunngilaq, Erik Jensen oqarpoq.

Naalakkersuisut ilinniartut ineqarfiinik sanaartornissamik unitsitsisimanerannik isumalimmik qulequtsiineq tassanngalu itisiliineq KNR-ip ajuusaarutigaa.

KNR-ip qulequtsiinera tassangalu itisiliinera allaaserisap imarisaanut tulluanngillat, tassami nukingertumik aalajangerneq peqqissaarussisimannginnerlu pillugit Erik Jensen isornartorsiorneqarpoq.

- Kollegianilli sanaartornernut aningaasartuutit aningaasaqarnermut inatsit missingersuutaanni (tassa pisortat aningaasartuutaasa annertusinnginnissaannik killissaq) ilaannginneri eqqorpoq, tamanna Aningaasaqarnermut Akileraartarnermullu Ataatsimiititaliap akuersinera tunngavigalugu pivoq, sanaartornerilli suli ingerlapput, aningaasaqarnermut naalakkersuisoq Erik Jensen naqqiummi taama oqarpoq.

KPMG-ip misissuinerani allaatiginnittut nassuaanerat KNR-ip allaaserisamini ima issuarpai:  

- Piffissap sivikinnera misissuinerup itisilerneranut imartussusianullu soorunami sunniuteqarpoq, taamaammallu inerneri tamanna toqqammavigalugu nalilerneqartariaqarluni, misissuinermi allaatiginnittut allapput.

Aningaasaqarnermut Akileraartarnermullu Naalakkersuisoqarfiup naqqiutaani Erik Jensen aamma ima oqarpoq.

- Nunani arlalinni kukkunersiuisartup aamma siunnersuinermut suliffeqarfiup KPMG-p innuttaasut aningaasaqarnerannik misissueqqissaarnerani, imminut akilersinnaasutut nalilermagu, kollegianik sanaartornermut aningaasartuutit missingersuutinit ilaatinneqannginnissaat pisinnaasimavoq.

Naqqiutigineqartoq KNR-ip akerlilinngilaa, allaaserisamili ima allalluni:

Misissuineq naapertorlugu ilinniartut ineqarfii ukiuni 50-ini napasinnaapput, aningaasartuutilli iluanaarutigineqalernissaanut ukiut 46-t ingerlaqqaassapput. Nalunaarutip taamaalilluni sanaartorneq "killilimmik iluanaarutaassasoq" inerniliissutigaa.

Allaaserisaq KNR-ip aaqqippaa, kukkunerlu ajuusaarutigalugu.