Ilinniartut Danmarkimiittut taarsigassarsiniartarneq pitsaaneruleqquaat
Kalaallit Nunaanni ilinniagaqarnersiuteqartitsivik aqqutigalugu ilinniarnermi taarsigassarsianik tunniussisarneq eqarpallaaqaaq, taama oqarpoq Avalammut siulittaasoq Britt Anne Nielsen.
Ilinniarnertuut peqatigiiffiata ilinniagaqartut kalaallit SU-mi inissisimalernissaat kissaatigaa. Qallunaat ilinniagaqartut taama atugaqarput, tassalu imaappoq ilinniagaqarnermi qaammammut 2.000 kr.-inik taarsigassarsisinnaallutik, semesterillu ataatsip ingerlanerani 12.000 kr.-inik taarsigassarsisinnaallutik.
Ilinniagaqartut Kalallit Nunaanni ilinniagaqarnersiuteqartitsivimmit ilinniagaqarnermi taarsigassarsiaat sanilliutissagaanni taakkua semesterimi ataatsimi 6.000 kr.-iupput.
Naatsorsorneqartussanulli aamma ilaavoq ilinniagaqartut Kalaallit Nunaanninngaanneersut ilinniarnertik aallartikkaangamikku ataasiartumik 10.000 kr.-it tigusarmatigik, ukiullu tamaasa Kalaallit Nunaannut angerlarnissaminnut akiliunneqartarlutik.
Tamakkua apeqqutaatinnagit ilinniarnermi taarsigassarsiat qaammatikkuutaartumik tunniunneqartalernissaat Avalaap kissaatigigaluarpaa. Ilinniagaqartut taamaalillutik ikinnerusunik atorfissaqartitsissagunik 6.000 kr.-inik taarsigassarsinissaannut pinngitsaalineqassanngillat.
Inatsisartunut ilaasortap Siumumeersup Aleqa Hammondip Naalakkersuisunut apeqqutigeqqammerpaa § 36 naapertorlugu apeqquteqaat aqqutigalugu ilinniagaqarnermi taarsigassarsiat eqaannerusunngortineqarsinnaanersut.
