Ilinniartut: Aasaru suliffissaarutissaagut?
Ilinniarfissuarmi ilinniartitsisunngorniat aasamut naammassisussat atorfinittussanik mattussineq ullumikkumiit aallartittoq toqqissisimanarinngilaat. Taakku aarleqqutigaat aasamut naammassigunik atorfinitsinneqarsinnaannginnissartik. Ullumili akerliussutsimik takutitsisut IMAKip Namminersorlutillu Oqartussat isumaqatigiinnerannut isummersorfittut aamma atorpaat.
Ilinniartut ilaatigut Naalakkersuisunit atuartitsinerulernissaannik piumasaqaatit inuiaqatigiinnut iluaqutaanavianngitsutut oqariartuutigaat.
Ilinniartut isumaqarput meeqqat atuarfiini meeqqat angusarinnerulissappata angajoqqaat kiisalu inuiaqatigiit suleqataanerusariaqartut. Ilinniartitsisullu sulineruleraluarpata iluaqutaanavianngitsoq unnerlugu.
- Atuarfik anaanaanngilaq, akisussaaffik ilinniartitsisunut tunniunniarneqartoq akuerisinnaanngilarput, Regina Lundblad, aasamut ilinniartitsisutut naammassisussaq, KNR.gl-imut oqarpoq.
Regina Lundblad ilinniartitsisutut misiliilluni sulinermini maluginiarsimavaa angajoqqaat meeqqamik atuarnerannut soqutiginninnerat annikippallaartoq.
- Atuarfimmi sulininni malugivara meeqqat 20-it missaanniikkaangata angajoqqaat meeqqamik atuarnerannut soqutiginnittut, ilinniartitsisunullu attaveqartartut tallimat missaannaaniittartut, Regina Lundblad oqarpoq.
Akerliussutsimik takutitsisut paaserusuppaat naammassigunik sumut atorneqassanerlutik. Minnerunngitsumillu kissaatigaat ilinniartitsisunik atorfinitsitsisinnaanermik mattussineq unitsinneqassasoq. Neriuppullu Naalakkersuisunit oqariartuutigisatik tusaaniarneqassasut.
- Aasamut naammassigutta atorfinikkusuppugut, namminiilerusuppugut angajoqqaatsinni najugaqaannarusunngilagut, ilinniartut ilaat Ulla Huch KNR.gl-imut oqarpoq.
