Ilinniartoq: Annaasassat amerlassaqaat

Isumaginninnermik ilinniartitaanerup nalaani pisariaqartinneqartut tamarluinnanjagammik Nuummi inissisimapput, ilinniakkaminik ukiumik siullermik ingerlataqareersoq, Pilutaq Lennert oqarpoq.

- Isumaqarpunga ilinniakkap pitsaassusaa annaaneqassasoq, manni Nuummiipput MIO, PAARISA, SAAFFIK aamma Socialanknævni Ilulissani immikkoortortaqanngitsut, tamakku ilinniarnitsinni atorluartakkavut, Pilutaq Lennert oqarpoq.

Ilinniarnerup nalaani pisariaqartinneqartut tamakku pissutigalugit, Pilutaq Lennert tassa isumaqarpoq, Isumaginninnermut Siunnersortinngorniarnermi ilinniartitaaneq Ilulissanut nuunneqartariaqanngitsoq. Taama isumaqarnerminut ilaatigut pissutaatippaa, immikkut ilisimasallit ilaanni ilinniartitsisuusartut imaaliallaannaq aggertinneqarsinnaasarneri, ilinniarfik Ilulissanut nuunneqassappat.

Immikkut ilisimasalinnik ilinniartinneqartarnerup saniatigut Ilisimatusarfimmi ilinniakkanik allanik ilinniartut attavigineqarluarneri, Pilutaq Lennertip annaaneqartussatut takorloorpaa.

- Isumaginninikkut siunnersortinngorniartut kisimik Ilisimatusarfimmi ilinniartuunngillat, inuiaqataigiilerinermik ilinniartut suleqatigilluartakkavut aamma Ilisimatusarfimmi ilinniartuupput, taakkulu ilinniarnitsinni atorluartarlutigit.

Pilutaq Lennertip aammaarluni oqaatigaa, ilinniartitaanini Ilulissanut nuunneqassappat, ilinnmiartitaanerup pitsaassusaa annaaneqassasoq.