Ilinniartitsisut sulinngitsuukulavallaarput
Qaammatit arfinillit ingerlanerinnaanni Nuummi atuarfeqarfiit ilinniarsimanngitsunik paarlatseqartarnerminnut katillugit 4,5 milliuunit atoreerpaat. Meeqqat atuarfiini ilinniartitsisut sulinngitsuukulanerat pissutaalluni ukiumi atuarfiusumi 2011-imi 2012-milu atuarfeqarfiit Nuummiittut malugisussanngorpaat.
- Ilumoorpoq paarlattaasartunut aningaasarpassuit atorneqareersut, taamaattumillu decemberip tungaanut Nuummi atuarfiit paarlatseqartarnerat killilersorneqartussanngorpoq, Hans Peter Broberg Kommuneqarfik Sermersuumi atuarfeqarnermut pisortaq KNR-imut oqarpoq.
Kommuneqarfik Sermersuup Nuummi atuarfeqarfinni paarlattaasartunut ukiumut 6 millioner koruunit aningaasaliissutigisarpai. Aningaasaliissutaasunillu januaarimit juunip tungaanut 3 milliuunit kingulliit atorneqartarput.
Aningaasaliissutigineqarsimasuniillu atuarfiusumut 2011-2012-imi januarimiit junip tungaanut aningaasat affaat sinnerlugit atorneqareersimapput, taamaattumillu qaammatini tulliuttuni tallimani December ip tungaanut aningaasat katillugit 1,5 millioner koruunit taamaallaat atugassiissutissatut aalajangiunneqarsimallutik.
Atuarfeqarfinnili tamani sipaarniarneq atuartut tamarmik misiginavianngikkaat Hans Peter Brobergip uppernarsarpaa.
- Atuarfiit namminneerlutik paarlatseqartarnermut tunngasut aalajangertassavaat, uanili pisumi meeqqat minnerit eqqorneqassanngitsut aalajangiupparput, Hans Peter Broberg oqarpoq.
Nuummi meeqqat atuarfeqarfiini paarlatseqartarnernut tunngasut december-imi aningaasaliissutaasartut 6 millioner koruunit tigusimaleriarunikkit, nalinginnaasumik ingerlasoqaleqqikkumaatoq Hans Peter Brobergip oqaatigaa.
