Ilinniartitsisut sulinngikulavallaarnerat arlalinnik peqquteqarpoq
Paarlattaarsartunik atuineq immikkut maluginiarneqassasoq Hans Peter Brobergip oqaatigaa, taakkuummata atuartunut immikkut pisariaqartitsisunut atorneqarnerusarsimasut. immikkullu pisariaqartitallit paaqqutarineqartarnerinut, piffissaq annertooq atorneqartartoq erseqqissaatigalugu.
- Atuartitsinermut sakkortusinnaasumik sunniuteqartarput, atuartut allat pitsaasumik pissarsissappata atuartut immikkut pisariaqartitsisut anninneqartariaqartarsimapput, Hans Peter Broberg oqarpoq.
 Taamaattoqarneranilu atuartut immikkut pisariaqartitsisunut paarsisorineqartartut, atuarfimmi paarlatsit atorneqartarput, paarlattaanermullu aningaasaliissutaasunit taakku matussuserneqartarlutik, taannaavorlu aningaasanik atuinerpaaffiusimasoq,
Atuartut immikkut pisariaqartitsisut paarlattaasartunit isumagineqarunnaarlutik, ilinniartitsisunilli ilinniarsimasunit isumagineqartalertut uani atuarfiusup aallartinnerani atuutilersoq, Hans Peter Brobergip oqaatigaa. Taannalu ingerlaavartumik nalilersuiffigineqartuarumaartoq erseqqissaatigalugu.
Meeqqat immikkut pisariaqartitallit, ilinniartitsisunit ilinniarsimasunit paaqqutarineqartalernerinut peqqutit ilagaat, ilinniartitsisut ilinniarsimasut meeqqap inuttut pisariaqartitai ilisimaarilluarnerummassuk.
Maanna Nuummi atuarfiit tallimaasut, immikkut atuartunut pisariaqartitalinnut atuartitsiviusumik peqalersimasut Hans Peter Brobergip eqqaavaa. Nuummiinnarlu atuartut immikkut pisariaqartitsisut meeqqat 40-it missilioraat oqaatigalugu.
- 2.klassiniit 10.klassi angullugu immikkut pisariaqartitallit ullumikkut inissittarpavut, atuarfinnilu tamani ilinniartitsisut marluk taakkununnga atorneqartarput, Hans Peter Broberg oqarpoq.
Atuartut immikkut pisariaqartitsisut Nuummi ukiukilligaluttuinnarneri Kommuneqarfik Sermersuumi atuarfeqarnermut pisortaasup nassuiaatissaqartinnagu oqaatigaa.
Ilinniartitsisut pikkorissariarlutik angalanerinut, atuartut paasisassarsiorlutik angalanerinut- ilinniartitsumik ilalerlutik, atuartut asimut angalaartarnerinut-ilinniartitsisumik ilalerlutik soorunalumi aamma napparsimasarnerit pissutaallutik. Ilinniartitsisup tamakkua kisiisa sulinngitsoorfigisaraluarunikkit, paarlattaasartunut aningaasaliissutit ajunnginnerusumik isikkoqarsimassagaluartut, Hans Peter Broberg oqarpoq.
