Ilinniartitsisut atuartitsinerussapput

Ilinniartitaanermut Naalakkersuisunngorlaaq, Palle Christiansen, taama oqarpoq, naqissusiillunilu ilinniartitsisut ataatsimiippallaarnernut taarsiullugu meeqqat aallunneqarnerusariaqartut. - Kommunit Namminersorlutik Oqartussallu Ilinniartitsisut kattuffiannut isumaqatigiissutaat, tassalu ilinniartitsisut qanoq sivisutigisumik sulisarnissaannik isumaqatigiissut qimerloorluarneqartariaqapoq, tassami ilinniartitsisut meeqqanik atuartitsinerunissaat anguniartariaqaratsigu. Ilinniartitaanermut Naalakkersuisoq, Palle Christiansen taama oqarpoq.Ilinniartitaanermut Naalakkersuisunngorlaaq, Palle Christiansen, taama oqarpoq, naqissusiillunilu ilinniartitsisut ataatsimiippallaarnernut taarsiullugu meeqqat aallunneqarnerusariaqartut.

- Kommunit Namminersorlutik Oqartussallu Ilinniartitsisut kattuffiannut isumaqatigiissutaat, tassalu ilinniartitsisut qanoq sivisutigisumik sulisarnissaannik isumaqatigiissut qimerloorluarneqartariaqapoq, tassami ilinniartitsisut meeqqanik atuartitsinerunissaat anguniartariaqaratsigu.

Ilinniartitaanermut Naalakkersuisoq, Palle Christiansen taama oqarpoq. Nangillunilu oqarluni ilinniartitsisut ataatsimiinnerminnut piffissaq sivisuallaartoq atortaraat:

- Ilinniartitsisut ataatsimiinneri ikilillugit, nalunaaquttap akunneri amerlanerit atuartunut atoraanni, ilinniakkat tungaatigut pitsanngortitsisoqarsinnaavoq.

Palle Christiansen oqarpoq.

Meeqqat atuarfiini naammassinnittartut ukiumut 850-it missaanniipput. Ukiuni qulini pinngitsoorani atuartussaatitaanerup atuutilerneratigut, ataatsimut isigalugu atuartut tamarmik inaarutaasumik misilitsittarput. Tamatuma kingorna toqqaannartumik ilinniakkamik aallartitsisartut, soorlu inuussutissarsiutinut ilinniartitaanermut imaluunniit ilinniarnertuunngorniartut, inuusuttut 15 procentiinnaat aallartitsisarput, tassa 130-t missaanniittut. Taakkunanngali aamma amerlavallaat ilinniakkaminnik unitsitsiinnartarput:

- Kikkut uniinnartarnerannik misissuinerit ersersippaat inuusuttut, utoqqasaat, arnat angutillu uniinnartartuusut, aamma misissuinerit ersersippaat nunaqarfimmiuuneq aamma illoqarfimmiuuneq apeqqutaanngitsoq, tassa imaalluni kikkut tamarmik uniinnarnissartik qinertarpaat, qanoq inooriaaseqarneq apeqqutaanani.

Palle Christiansen taama oqarpoq. Ilinniakkamik unitsitsiinnartarneq siunissami pinngitsoortinniaraanni meeqqat atuarfiini ajornartorsiutinik takunnissinnaaneq pimoorunneqarnerulertariaqartoq, Ilinniartitaanermut Naalakkersuisup oqaatigaa.

- Ilaqutariit inuuniarnermikkut ajornartorsiuteqartut ingerlaannartumik ikiorserneqartarnissaat maanna anguniagassatut siulliunneqartariaqarpoq, taamaaliornikkut meeqqat atuarfiannit ingerlaqqittussat nukittorsarneqassammata.

Ilinniartitaanermut Naalakkersuisoq, Palle Christiansen taama oqarpoq.

Taassuma aamma ilanngullugu oqaatigaa, nunaqarfimmiut meeqqat atuarfiini ingerlaqqinniartut klassit arfineq aappaanniit qulingat ilanngullugu, illoqarfinni pitsaanerusumik naammassinnittarnissaat anguniarneqartariaqartoq, taamaaliornikkut toqqissisimanerullutik ilinniakkanut qaffasinnerusunut ingerlaqqittarnissaat anguniarlugu.