Ilinniartitsisut atuartitsinerusariaqarput

Atorfineqqusiunnaarniarlutik ilinniartitsisut kattuffiat IMAK ippassaq nalunaarpoq. Taamatut iliornialerput qaangiuttoornerit suliffiup naliginnaasup iluani aaqqinneqartassasut Naalakkersuisut piumasarimmassuk.

Maannalu Namminersorlutik Oqartussat kommuunillu akissuteqarput piumasaralugu atuartitsinermut piffissaq annertunerusoq atorneqartalissasoq piareersarnermut piffissaq annikinnerusoq atorlugu.

Naammassisaqartarnerup pitsanngortinnissaanik piumasaqarneq tamakkiisumik unammilligassaavoq inuiaqatigiit tamakkerlutik ukiuni makkunani peqataaffigisariaqagaat inuiaqatigiinnilu susassaqartut tamarmik anguniarnerani peqataaffigisariaqagaat, kommuneqarfiit kattuffianni Kanukokami siulittaasoq Martha Abelsen aamma Aningaasaqarnermut Naalakkersuisoq Maliina Abelsen isumaqatigiinniartarnernut akisussaasoq nalunaarput.

Taakku isumaqarput piffissaq annertunerusoq atuartitsinermut atorneqartalerpat atuarfiup pitsaassusaa qaffakkumaartoq.

Atuarfitsialak kingullermik nalilersorneqarmat paasinarsivoq atuarfimmiit soraarummeertut tallimaagaangata pingasut ilinniakkamik aallartitsineq ajortut.

Atuartut 2009-miit 2010-mut misilitsittarnerit tunngavigalugit misissuinerit takutippaat oqaluttariaqarsornermi atuartut piginnaasaat appariarsimasut. Tassani pineqarput qallunaatoorneq 3. klasse-niit 7. klassenut, 7. klasset kalaallisoortarnerat kiisalu 3. klasset 7. klassellu kisitsinermi piginnaasaat. Atuartut misilitsittarneranni angusat takutippaat atuartitsinerup pissarsissutaasarnera, nalilersuinermi nalunaarusiami 2010-mi taama allaaserinnittoqarpoq.

Ilinniartitsisut atorfineqqusiunnaarnissaat martsip aallaqqaataani aallartissaq arlaatigut isumaqatigiittoqanngippat.