Ilinniartitsisunngorniartarneq nutarteriffigineqalerpoq

- Faagini atuartitsinerit nukittorsarneqarnissaannut tunngasut isumaqatigaakka. Taakku saniatigut atuartitsinermi periutsini arlalinni nukittorsaasoqartariaqarpoq, kikkut atuartinneqarnersut qanorlu pisariaqartitsinersut apeqqutaasarmat, IMAK-imi siulittaasoq Sivso Dorph taama oqarpoq.

Meeqqat atuarfiata siunertaa anguniagaalu naapertorlugit ilinniartitsisut sulisinneqarnissaat allanngortiterinermi siunertarineqarpoq, taamatuttaaq ilinniartitsinermi angorusutanut malinnaasinnaanissaat kiisalu perorsaanermi ilisimatuussutsikkut paasisanik nutaanerpaanik tuniorarneqartarnissaat qulakkeerniarneqarpoq.

Ilinniartitsisut amerlanerpaat faagini atuartitsiffissamittut ilinniarsimasaminni atuartitsisalernissaat kiisalu ilinniartut faagini pingaarnerni, tassalu kalaallisut, danskisut, matematikkimi aamma tuluttut sammiviusuni toqqaasalernissaat aamma suliniutigineqarpoq.

Ilinniarfissuaq ukioq manna 46 million koruunit missaannik aningaasaliiffigineqarpoq. Naalakkersuisut tusarniaanerat februaarip 18-ianut killeqarpoq.”