Ilinniartitsisuminit pukutsumigut nujaartugaasarsimavoq
- Ilinniartitsisut ilaata soorlu nutsakkut tigoriarlunga atuaqatima tungaanut saatsillunga qianissara utaqqisarpaat qissasseraangamalu ilaanni tiimi tamaat qiatinniarsarisarlunga. Tassa timikkut tarnikkullu naalliutsitsineq - ataataqannginnera peqqutigalugu, Karl Davidsen oqarpoq.
Karl Davidsen kommunalbestyrelsemi Atassut sinnerlugu 2001-imili ilaasortaavoq, ulluinnarnilu Akisuasoq Radio & TV-mi sulisuulluni. Anaanani aananilu peroriartorfigai, ataatani qallunaajusoq nalullugu. Ataataqarnani peroriartortuulluni atuaqatinit aamma qinngasaarneqarneq misigisarsimavaa.
- Atuarfimmi meeraqatit ilai ataataqannginneraallutik qinngasaarillutik, akerartuutitupajaatut nipinitsillugu oqaluttarnikuupput, oqarpoq nangillunilu:
- Suli annernarnerulertarpoq ilinniartitsisut akuupajaaleraangata. "Uersakkat" immaqa nalikinnerusutut ilisimasakinnerusutullu taamanikkut isigineqartarnerisa nalaanni peroriartortuugamik namminneq ilinniartitsisuuleraangamik atoqqilertarunaramikkit.
Taamaammat Karl Davidsenip ilimagaa, ilinniartitsisut taama isiginnittarnerisa naalaani namminneq 1970-ikkunni atualersut generationit (kinguaariit, aaqq.) kingullipajaat ilagigaatsik.
- Soorunami ilaanni nalikinnerulertutut imminut misigilertarnikuuvunga, unali nukittoqutigigunarpara atuarfimmi malinnaaniarsarisuugama. Anaanamik ilaquttakka, pingaartumik illooqqakka, nukittoqutigisorujussuusarpakka.
Illooqqami angutitaat ukiut qulit missaannik angajulliit ataatatupajaaq peroriartorfigisimagamigit aallaqatigisarlugillu misigisaqarfigisimavai.
Karl Davidsenip meeranermini pisartut aatsaavissuaq avammut saqqummiuppai. Misigisimavorli isumakkeerfiginninneq aanaminik ilikkakkani inuunermini pingaaruteqartorujussuusimasoq.
- Aananninngaanniit ilikkakkatta ilagaat isumakkeerfiginnissinnaaneq aammalu inoqatit ataqqillugit inuunissaq. Oqaassutai tigusimagunarpakka ingerlariaqqinnissarlu toqqarsimallugu.
Allaammi meeraanermini ilinniartitsisut ataasiakkaat imminik naalliutsitsisartut qungujulluni naapissinnaajuarpai.
- Naapittarpakka - imatut pisimasut pinngikkaluarlugit - qungujullunga ilinniartitsisorisimasakka oqaloqatigisinnaasarpakka. Aamma arlaannik ilerasuutissaannik naamik tuniniarnikuunngilakka. Isumakkeerfiginikuuakka.
Karl Davidsen nulianilu pingasunik erneqaramik, perorsaanerminni pingaartippaat kingumut qiviarnaveersaarnissaq.
- Kingumut eqqarsarnaveersaartarpunga. Ingerlariaqqinnissaq eqqarsaatiginerullugu pereersut aporfissatut eqqarsaatiginaveersaartarpakka, Karl Davidsen oqarpoq.
Karl Davidsenip angunni qallunaajusoq ukiut arfineq-pingasut matuma siornagut nassaarigamiuk kingorna tikeraarpaa, nuliatalu internetimi Facebookikkut allaqatigisarneratigut suli ullumimut attaveqarfigalugu.
