Ilinniartitsisoq: Ilinniarfiit siammarterlik

Tamanna ajorpoq, Marie Lyberth Mathiassen oqarpoq. Taanna Niuernermik Ilinniarfimmi Qaqortumi ilinniartitsisuuvoq, isumaqarlunilu Nuummi Niuernermik Ilinniarfik allamut nuunneqartariaqanngitsoq.

Marie Lyberth Mathiassen ima siunnersuutissaqarpoq.

- Ilinniarfiit ilinniartitsisullu pioreersut atorluarnerisigut aamma ilinniartitsisunik nutaanik pikkorissunillu atorfinitsitsinikkut ilinniarfiit siammarneqarsinnaapput.

Taamaalilluni Marie Lyberth Mathiassenip Kujataani borgmesterimi siunnersuutaanut killormoortumik siunnersuuteqarpoq, tassalu ilinniarfiit siammarnerisigut periarfissat ilinniakkallu pitsaanerusut anguneqarnissaat ujartorlugu.

Ilinniartitaanermut Naalakkersuisup ilinniarfinnik siammartiterinissamik oqarnera Marie Lyberth Mathiassenip isumaqatigisinnaagaluarlugu oqaatigaa, kisiannili ilinniarfiit ataasiakkaat ataatsimoortinneqarnissaanik oqarnera isumaqatiginagu.

Ilinniartitaanerit assigiinngitsut siammarnissaat misissorneqartariaqartoq, Marie Lyberth Mathiassen isumaqarpoq, soorlu niuernermik ilinniarfiit Ilulissani immikkoortortaqarfeqalersinnaanissaa misissorneqarluni aamma peorsaasunngorniarnermik ilinniarfik Ilulissaniittoq Qaqortumi immikkoortortaqarfeqalersinnaanissaa misissorneqarluni.

- Massakkut pissutsit aallaavigalugit ilimagaara, aningaasat sipaarneqarsinnaanerusut atorluarneqarsinnaanerusullu pitsaanerusumik ingerlanneqarsinnaapput, immikkoortortanut amerlanngitsunut, soorlu pingasunut agguaakkaanni. Taamaalilluni sumiiffinni ataasiakkaani ilisimasat atorluarneqarsinnaapput. Aamma illoqarfigisamit ungasippallaamit ilinniarnermi, ilinniartut unitsitsiinnartartut amerlavallaarnerannut tamanna pissutaasinnaagami.

Niuernermik Ilinniarfik Nuummiittoq aamma Qaqortumiittoq assigiinngitsunik tunaartaqarlutik ilinniartitseriaaseqartut, Niuernermik Ilinniarfiit siulersuisuini siulittaasup, Bjørn Holmip oqarnera, Marie Lyberth Mathiassen-ip isumaqatigaa oqarluni ilinniarfiit taakku tamarmik immikkut pisinnaasatik aallaavigalugit ineriartortinneqartariaqartut nuunnagit. Ataatsimoortinneqalernerisa kingunerissavaa ilinniartut naammassinngitsoortartut amerlareeqisut suli amerlanerulernerinut, Marie Lyberth Mathiassen oqarpoq imalu nangilluni.

- Ilinniarfinnit siammaanerup kingunerissavaa, ilinniakkaminnik unitsitsisartut ikinnerulerneri.

Niuernermik Ilinniarfimmi Qaqortumi ilinniartitsisoq, Marie Lyberth Mathiassen taama oqarpoq.