Ilinniartitaanermut pilersaarut tusarniaassutigineqarpoq
Inuusuttuaqqat meeqqat atuarfiannit naammassisartut 43 %-ii ilinniarlutik ingerlaannaq aallartinneq ajortut, kisitsisit 2012-imeersut takutippaat. Iliuusissanik imaqartut marluk, tassalu Ilinniartitsinermut Periusissiaq 2014 Ilinniartitsinermullu Pilersaarut II, manna tusarniaassutigineqarput.
Allattoq Thora H. Nielsen
februaarip 07-at 2014 14:17
Meeqqat atuarfiata nalilersuiffigineqarnissaa aamma ilinniartitsisunngorniartarnerup allanngortiteriffigineqarnissaa pilersaarutinut ilaapput. Taamatuttaaq illuutit misissorneqassapput pisariaqartitanillu nalilersuisoqassalluni. Inuussutissarsiornikkut ilinniartitaanerit inerisarneqassapput kiisalu suliffeqarfiit sungiusarfiusinnaasut amerlineqarnissaat sulissutigineqarluni. Aamma Ilisimatusarfimmi ilinniarneqarsinnaasut amerlineqarnissaat siunniunneqartunut ilaavoq. Taakku saniatigut meeqqeriviit piorsaavigineqarnissaat pisariaqarluinnartoq Ilinniartitaanermut Naalakkersuisoq Nick Nielsen oqarpoq:
- Meeqqeriviit nunaqarfinni amerlineqassapput, nunaqarfimmiullu amerlanerusut nunaqarfitsik qimannagu ilinniarsinnaanerat periarfissarsiuunneqassalluni. Nunaqarfinni meeqqeriviit ukiorpassuit inerisarneqarnikuunngimmata immikkut ittumik maanna suliniarfigaavut.
Ilinniartitaanermut Naalakkersuisoq Nick Nielsen taama oqarpoq. Tusarniaaneq februaarip 18-ianut killeqarpoq. Ilanngutassiaq Thora H. Nielsenimit suliarineqarpoq. Suliniutit tamarmik katikkaanni 120 million koruuninik naleqarput.
