Ilinniartitaaneq pitsanngorsarneqaqquaat
Ukiuni aggersuni Canadami naggueqatigiit Inuit unammillerniagassaat pingaarnerit tassaapput ilinniartitaanikkut pitsanngorsaanissaq aamma uagut Canadamiullu allat assigiinngitsunik atukkatigut atugaqarnitta minnerulersinnissaat, Mary Simon Inuit Tapiriit Kanatami siulittaasoq sapaatip akunnerani matumani tusagassiuutinut nalunaarummini taama allappoq.
Ilinniartitsisut naggueqatigiinnit Inunneersut, Canadami tamarmeersut marsip qiteqqunnerani Paggivittami siullerpaamik katersuutsinneqarput. Ilinniartitsisut katersuutsinneqartut atuartunik minnernik ilinniartitsisuupput, tassa meeqqerivinniit qummut 3. klassinut ilinniartitsisuugamik. Isumaliutitik kissaatigisatillu sapaatip akunnerani matumani allattoriarlugit, ministeriunermut Stephen Harperimut allagaqarput, matumuuna atuaqatigiinni taakkunani atuartut nukarliit pitsaasumik atuartinneqarnissaasa pingaaruteqassusianik paasitikkusukkamikku.
Taakkua kissaatigaat, Canadami naalakkersuisut ilinniartitaanermut amerlanerusunik aningaasaliissasut, tassami ingammik sumiiffinni ataasiakkaani ilinniartitsisut tulluanngitsumik ilinniagaqarlutillu akissaatiluttuummata. Taakku kissaatigaat atuarfiit illutaat sukumiisumik pitsanngorsaavigineqassasut, tassa illuutit kialaartuusariaqarmata najoruminarlutillu, atuartut taamaalillutik pitsaasunik avatangiiseqarlutik pinnguarsinnaallutillu ilinniarsinnaaniassammata.
Tamatuma saniatigut naggueqatigiit Inuit ilinniartitsisut ministeriuneq qinnuigaat, naggueqatigiit Inuit oqaasii illersorneqarlutillu atuarfinni atuartitsissutigineqassasut. Meeqqat atuartinneqarneranni kulturiat, oqaasii sumiiffinnilu ataasiakkaani inooriaasiat atuartitsinermi eqqarsaatigineqartariaqarmata. Tamakkuninngalu atuartitsisinnaasunik amerlanerusunik ilinniagaqartoqartariaqarluni.
Ilinniartitsisut naggueqatigiinnit Inunneersut, naggueqatigiit Inuit ilinniartitaanerannut ataatsimiititaliamut, Mary Simonimit siulittaasuuffigineqartumut ilaasortaapput. Taakkua ministeriunermut siunnersuuterpassui tassaapput, ilinniartitaanermi periaasissatut siunnersuutitut ataatsimiititaliap ukiormanna kingusinnerusukkut saqqummiunniagaasa ilaat.
