Ilinniartitaaneq pillugu Tasiilami saqqummersitsisoqarpoq
Sermersuumi Inuussutissarsiorneq pillugu Siunnersuisooqatigiit Tasiilami ukiaq saqqummersitsineranut workshoppertitsineranullu malitseqatitsineruvoq. Nunatsinni ilinnialernissamut qinnuteqarfissaq kingulleq tassaavoq marsip aallaqqaataa, tamannalu pissutigalugu februaarip 20-ia toqqarneqarsimavoq. Saqqummersitsinermi inuussutissarsiutitigut ilinniartitaanerit ilinniartitaanerillu inuusuttunut neqeroorutigineqartut immikkut sammineqassapput.
-Suliffeqarfiit suliffeqarfitsik ulluinnarnilu suliarisartakkatik pillugit oqaluartinniarlugit aggersarsimavagut. Najukkami suliffeqarfiit namminersortut pisortallu suliffeqarfissuisa taama annertutigisumik tapersersuinerit qujamasuutigalugulu nuannaarutigeqaarput. Royal Arctic Line Air Greenlandilu Nuummit sulisumik saqqummersitsinermut peqataasussamik Tasiilaliartitsipput, suliffeqarfiillu nammineq ingerlatat suliaqarfiitik pillugit aamma oqaluttuariartussapput -Taama tapersersorneqartiginerput nalissaqanngilaq, Attaveqaqatigiit ilinniartitaaneq pillugu saqqummersitsinermik aaqqissuisuusut oqarput.
Tasiilami Alivarpi, Piorsaavik Tasiilaq aamma Piareersarfik Tasiilaq ilitsersuinissamut piareersimassapput, aammalu ilinniartitaanerit assigiinngitsut periarfissaasullu oqaluttuarissavaat.
Attaveqaqatigiit ilisimaarilluarpaat inuusuttut tamarmik ilinnialernissaminnut piareersimanngitsut aammalu aallartinniarneq ataasiakkaanit nalornissutaasartoq. Taamaammat aamma inuusuttut suliffeqarnermut akuulernissaminnut qanoq iliornissaannik ilitsersuisussanik saqqummersitsinermi aamma peqataasoqarumaarpoq.
