Ilinniarnertuunngortut aatsaat taama amerlatigisut
Nunatsinni ilinniarnertuunngorniat 344-t sapaatit-akunnerata siuliani nasartaarput.
Allattoq Hagen Højer Christensen
juunip 30-at 2014 08:14
Ilinniarnertuunngortullu aatsaat taama amerlatigipput.
Ilinniarnertuunngorlutik nasartaartut 2010-mi 260-iusinnarlutik qaffakkiartuinnarsimapput ukiormannalu 344-llutik - taakkulu ilinniarnertuunngorniarfimmi nalinginnaasumi, HTX-imi HHX-imilu ukiuni pingasuni ilinniarnertik naammassivaat.
Aammattaaq ilinniarnertuunngorniarfinni piareersaataasumik inersimasunut ukiumi ataatsimi pikkorissartitsinermi 38-it allagartartaartinneqarput.
Ukiormannalu allagartartaartut ilinniarnertuunngorniarfiit taamatut iluseqartillugit soraarummeertut kingullersaraat. Ilinniarnertuunngorniarfinnik iluarsartuusseqqinnerup kingorna ataatsimoorussamik ilinniarnertuunngorniarnermi nutaami GUX-imi naammassisussat siulliit aappaagu nasartaassapput.
