Ilinniarnertuunngorniat sunngiffimmi atuartinnerisigut ingerlariaqqiffiusumik ilinniarnissaannut ikiorneqarput

Tunniussassatik suliarisimanngikkaangamikkik taamaaliortariaqartarput. Atuarfimmilu ilinniartitsisuusup ikiorneqartarpai. 

Takkutinngitsoorunillu atuanngitsoortutut nalunaarsorneqartarput.

Piffissap ilinniartunut atorneqartarput allanngortinneqarnerata malitsigisaanik, ilinniartitsisut atuarfimmi piffissaq ilinniartunut atugassamik 40 procentia ilaatigut  ilinniartut ilinniagassanik suliassaannut atortussanngorpaat. Piffissaq ilinniartunut atorneqartussaq siornatigut ilinniartut suliaannik kukkunersiuinermut atorneqartaraluarpoq.

Nutaatut suliniutigineqartoq ilinniartut ilaasa naammaginngilluinnarpaat. Taakku allagaqarlutik naleqqutinngitsumik piumasarfigineqartutut misiginerarput, aammalu timikkut tarnikkullu qasutitaanerarlutik, sunngiffimmi peqqinnartunik sammisaqarsinnaajunnaarlutik innajaarsinnaajunnaarnerarlutillu.

Ilinniarnertuunngorniarfiup pisortaata Poul V. P. Jensenip ilinniartut isumaqatiginngilai piffissallu atuartumut atorneqartussap allanngortinneqarnera periarfissanik pitsaasunik ammaassinerarlugu.

- Ilinniartut ilaasa sunngiffimminnik arsaartugaasutut misigisimanerat nalunngilara. Kisianni taamaakkaluartoq suliassat suliarineqartussaapput. Imaanngilarmi suliassat amerlineqarsimasut, amerlassusaammi taamaattuaannarsimapput. Ilinniartitsisunit ataasiakkaanit ikiorneqarnissamut periarfissat annertusiinnarput, tamannalu ilinniartitsinermi sakkussatut pitsaalluinnartutut isigaara.

Poul V. P. Jensen taama oqarpoq.

Piffissap ilinniartunut atorneqartussap allanngortinneqarnera ilinniartitsisunut ilinniartunullu suli nutaajusoq aamma oqaatigaa, aamma piffissaq qanoq annertutigisoq atorneqassanersoq naleqqussarneqartariaqarsinnaassasoq, pitsaasumullu aqqutissaanera qularutiginnginnerarpaa.

 Ilinniarnertuunngorniarfiup pisortaata ilinniarnertuunngorniarfimmi pingaarnertut oqallisaasartut marluusut aamma oqaatigaa.

- Tassalu suliassanik suliaqanngitsoortarneq atuanngitsoortarnerlu. Suliassanillu suliaqartoqanngitsoortillugu - assersuutigalugu ilinniartut suliassat suliarinngitsuugaat tallimanngorpata - taava atuariartunngitsoortarput, atuariartunngitsoorunillu atuanngitsoornerisa nalunaarsorneqarnerat qaffassaaq, ajortullu taamaalillutik kippiveqanngitsunngortarlutik.

Aaqqissuussineq septembarimi aatsaat aallartinneqarpoq, aamma ilisimatuussutsikkut tunngaveqanngitsumik ingerlanneqarpoq, taamaakkaluartorlu Poul V. P. Jensen pitsaasumik angusaqarfiunera takusinnaalereersimavaa.

- Suliassat suliarineqanngitsoortarneri appariarfiusimasoq takuneqarsinnaalluarpoq. Tamannalumi nuannaarutissavoq, aamma ilinniartut suliassaminnik suliaqanngitsoortarsimasut maanna atuariartornissartik qunugiunnaarsimavaat.

Ilinniartulli kisiisa matumani pineqanngillat, ilinniartitsisut aaqqissuussineq nutaaq aamma tunuarsimaarfigisimavaat.

- Assigiinngitsunik isumaqarfigineqarpoq. Ilinniartitsisulli aaqqissuussineq pitsaasutut isigigaat isumaqarpunga.

Ilinniarnertuunngorniarfiullu pisortaa malillugu aaqqissuussineq sungiunniaqqaartariaqarpoq

Ilinniartitsisut angerlarsimaffimminni ilinniartut suliaannik kukkunersiuiinnarunnaarlutik aamma atuafiliartartussanngorsimapput. Aamma suliassat tunniunneqanngitsoortut kukkunersioneqartarnerinut akissarsissutigisarunnaarsimavaat.

Ilinniartunullu tunngatillugu ilinniarfiup pisortaata ilinniartut piumasaqaateqarfiginissaat pisariaqartoq erseqqissaatigaa, taamaaliornikkut ilinniarnikkiut ingerlariaqqissinnaaniassammata.

- Ilinniartuutigisimagummi Danmarkimi Nuummiluunniit ingerlariaqqiffiusumik ilinnialersimasut artorsartartut tusarfigisarpagut. Arlaatigut iliuuseqarluta ilinniagaqassagaanni aamma tamanna sulissutigisariaqarneranik perorsartariaqarpugut.