Ilinniarnermut immikkut ilisimasallit nutaat 20-t
Pisortap Dorthe Korneliussenip tulluussimaarluni masterinngortut Seqinnarissuup ataani Ilinniarfissuarmi Eqaarsaarfitoqqami allagartassaannik pilluaqqullugit tuniorarpai.
Ilinniakkaminnik naammassinnittut namminneq atuartitsinertik, inuiaqatigiit, kulturip, ilinniartitaanerup aaqqissuusaanerullu ataqatigiissuseqarnerat sukumiisumik misissuillutik ilisimasaqarfigilerlugu tunngavilimmik nalilersorsinnaanngorpaat.
Ilinniagaqartut tamarmik ilinniartitsisutut ilinniarsimapput annertuumillu nunatsinni atuarfeqarnermi misilittagaqarlutik. Masterinngorniarnerminni nunarsuarmioqatigiit pædagogikkimi ilisimatusarnikkut ilisimasaat itisuumik ilisimatusarfigaat.