Ilinniarnermusiat qaffassasut: Ilinniartut ukiortaareerput ima aningaasarsitigisalissapput

Ilinniarnermusiat aningaasat naleerukkiartornerat ilaatigut nukissiuutinut inuussutissarsiutillu akisunerulernerannik kinguneqartut malillugit qaffanneqassapput.
Ilinniartut ilinniagaqarnersiutaasa maanna qaffanneqalernerat, Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter Olsenip nuannaarutigalugulu tulluusimaarutigaa. Assi © : KNR
Allattoq Teitur Larsen
decembarip 30-at 2022 13:05

Nunatsinni ilinniartut ilinniagaqarnersiutimi ukiumi nutaami qaffanneqarnissaat naatsorsuutigisinnaavaat.

Aappaagumut 2023-mut aningaasanut inatsisissatut siunnersuummi, inatsisartut novembarimi akuersissutigisaanni tamanna takuneqarsinnaavoq.

- Qaffaataasoq annertugisassaanngikkaluartoq, taanna paasilluarsinnaavara sullugineqalaarsimappat, kisianni angusinnaasarput annerusinnaasimanngilaq.

- Pissutisit assigiinngitsut tassani peqqutaapput. Ilaatigut eqqaasinnaavagut aningaasakilliorneq, aamma aningaasaqarnikkut sukangasuumik ingerlatsisariaqarsimavugut.

- Ajoraluartumik Ukrainemi sorsunneq nunarsuatsinnut aamma sunniupopoq, ilaatigut sanaartornikkut, ikummatissatigut inuussutissatigullu akit aamma qaffapiloorsimapput, Peter Olsen KNR-imut oqarpoq.

Siunissamut isumalluartoq

Ilinniartut ilinniagaqarnersiutaasa maanna qaffanneqalernerat, Ilinniartitaanermut Naalakkersuisup Peter Olsenip nuannaarutigalugulu tulluusimaarutigaa.

- Iliuuserisarput siunissami ilinniarnermusiat ukiut tamaasa akit qaffakkiartornerata malillugit nalimmassarneqartalernissaat ammaassissusutut isigivara. Aamma ilinniartut atugaasa siunissami pitsaanerulersinneqarnissaannut alloriarneq siulliuvoq .

- Taamaattumik nuannarpunga tulluusimaarlungalu ilinniagaqarnermusiat, ukiorpassuarni akit qaffakkiartorneranut nalimmassarneqarsimanngitsut, kiisami nalimmassarneqarnissaat angusinnaasimagatsigu.

Ilinniartunut 18-ileereersimasunut ilinniagaqarnersiutit qaammammut 134 koruuninik qaffanneqassapput. Ilinniarfinni piareersarfiusuni ilinniartut angajoqqaaminni suli najugaqartut ilinniagaqarnersiutaat qaammammut 63 koruuninik qaffassapput.

AAMMA ATUARUK Inatsisartuni partiit Aningaasanut Inatsimmi 2023 pingaarnerpaatitaat

Aningaasat naleerukkiartornerat pissutigalugu akit qaffammata, ilinniagaqarnersiutit taakku malillugit aaqqiivigineqartut, Peter Olsen nasssuiaavoq.

- Ullumikkut akit qaffakkiartorneranut una qaffaaterput immaqa naapertuuppallaanngikkaluarpoq, kisiannilu soorlu oqarnittuut qaffaanerput uani siulleq isumaqarpunga ammaasuusoq, siunissami akinik qaffakkiartortuni nalimmassaanissatsinnut naapertuukkiartuaarnerulernissaanut, Peter Olsen oqarpoq.

18-it sinnerlugit ukiullit ilinniaqqiffinnut ingerlaqqittut ukiortaamiit qaammammut tapiissutissaat 4.834 koruuniusassapput. Ilinniarnerni piareersarfiusuni ilinniartut suli 18-iliineqanngitsut tapiissutaat ukiortaamiit qaammammut 2.288 koruuniusassapput.