Ilinniarnerminnik naammassinnittut nunatsinnut utertikkusuppaat
Suliffeqarfiit nunatsinneersut 20-t Københavnimi saqqummersitsinersuarmut peqataapput.
Danmarkimi nangitsillutik ilinniartut nunatsinneersut 70-it saqqummersitsinersuarmut qaaqqusaasimapput.
Suliffeqarfiit saqqummersitsinermut peqataanerminni periarfissat suunersut takutinniarpaat, ilinniartullu taakku 70-it ilinniakkaminnik naammassinnikkunik nunatsinnukarlutik sulilersinnaanissaat neriuutigineqarpoq.
Suliffeqarfiit saqqummersitsisarnerat ukiut pingajussaa pivoq, ukioq mannalu nunatsinniit Nuuk, Sisimiut Qaqortullu kommuniisa peqataatitaqarput.
Namminersornerullutik Oqartussat peqataatitaqarputtaaq, akileraartarnermut pisortaqarfik, Ilaqutariinnut pisortaqarfik kiisalu suliffissuaqarnermut pisortaqarfik peqataatitaqaramik.
Suliffeqarfiit saqqummersitsisalermatali Tele Greenland peqataatitaqartarsimavoq, saqqummersitsinersuarmullu peqataasarneq imminut akilersinnaasoq, Tele Greenlandimi sulisunik ineriartortitsinissamut pisortaq John Kaarsberg oqarpoq:
- Suliffeqarfiit saqqummersitsinerannut peqataasarnigut aningaasatigut iluaqutissartaqarpoq, sulisussarsiornermilu aningaasartuutigut annertugisassaanatik, John Kaarsberg oqarpoq.
Erneeraq Zeeb ingeniørinngorniarpoq, aqqusinniornermut immikkut sammisaqarluni. Saqqummersitsinersuarmi najuuppoq, ilinniakkanilu naammassiguniuk nunatsinnut uterusuppoq, ajornanngippat illoqarfiit annerit ilaannut:
- Illoqarfinni annerni najugaqarnissara orniginartinneruara. Pisoqarfiup nalaaniikkusuppunga, suliassallu annerit aallutarerusullugit, Erneeraq
Zeeb oqarpoq.
Kalaallit Københavnimi Odensemilu ilinniartut nunatsinni suliffissarsiornissaannut ippassaq soqutiginnilersinniarneqarput, ullumikkullu kalaallit Jyllandimi ilinniartut ilinniakkaminnik naammassinnikkunik nunatsinnukartinniarneqassallutik.
