Ilinniarfik sungiusarfissaqannginneq pillugu ernumavoq
- 2015-mi ilinniagaqarniarlutik qinnuteqartut akornanni 26-it sungiusaatigalugu suliffissaqareerput. Tamanna 2009-mut naleqqiullugu ajorseriarneruvoq, tassa taamani ilinniartut akornanni 69-it sungiusaatigalugu suliffissaqareerlutik aallartimmata.
KTI-p siulittaasua, Alex Nørskov oqarpoq.
Ilinniartut amerlanerusut sungiusaatigalugu suliffeqartarnissaat pillugu suliniuteqartoqassasoq, ilinniartitaanermut naalakkersuisup, Nivi Olsenip aamma ineqarnermut naalakkersuisup, Knud Kristiansenip taamatullu Nunatsinni sulisitsisut peqatigiiffianni, GE-mi siulittaasup, Henrik Lethip tusagassiuutinut nalunaaruteqarnerminni pingaartitatut eqqaavaat. Tamannalu pillugu maanna qanoq iliuuseqartariaqartoq oqarlutik.
Suliffeqarfeeqqat suliakkerneqarnerusassapput
Suliffeqarfiit mikisut anginerulaartullu suliakkerneqartarnissaannik politikkut kaammatuutaasoq pingaartinneqarunnaarsimammat tamanna ilinniartut suingiusaammik sulisinneqartartut ikileriarnerinut aamma sunniuteqataasimasoq, Alex Nørskov oqarpoq imalu nangilluni.
- Suliffeqarfeeqqat mikinerusut naammattumillu angissuseqartut ingerlatinermut iluarsartuussinernullu suliakkerneqartaraluartut ukiuni kingullerni suliakkerneqartarunnaavissimapput, tamannalu ernumanartut KTI-mit isigaarput.
Alex Nørskov oqarpoq aamma oqaluttuaralugu ilinniartut sungiusartarnissaat eqqarsaatigalugu, suliffeqarfinnut attaveqaataasussamik atorfinitsitsinissaminnut aningaasanik oqartussanut qinnuteqarsimagaluaramik itigartinneqarsimallutilli.
Ilinniartut sungisaammik suliffissaqartannginneri pillugu ilinniartut atuarfimminni sungiusartinneqartarput. Ilinniarnerulli naammassereernerani ilikkagaat annikippallaartartut, Alex Nørskov oqaluttuarpoq.
Ilinniarfissaqannginnermi pikkorillinavianngilagut
Ilinniartulli ilinniakkaminnik maanaannaq taamaatitsiinnartassanngippata periuseq tamanna allatut ajornartumik atorneqartartoq, Alex Nørskov oqarpoq.
- Suliffeqarfinni atuarfimmiluunniit sungiusaatigalugu sulisoqartanngippat tamanna ilinniagarerusutamut qinnuteqannginnermik kinguneqartussaassaaq amma maanaannaq unitsitsinermik kinguneqarsinnaalluni.
Sanaartornermi Ilinniarfiup, KTI-p Saviminerilermilu Ilinniarfiup siulersuisuisa siulittaasua, Alex Nørskov taama oqarpoq.
