Ilinniaqqissimanngitsut ujartorneqartarput

Ilinniakkamik ingerlatitseqqinnissaq anguniarlugu taama periuseqartarput. Periuseq taanna Kommuni Kujallermi 2012-imi 2013-imilu iluatsilluarsimavoq.

Meeqqat atuarfiannit naammassisut ingerlariaqqinnissaannik ikiorneqartussaapput. Kommunini atuarfeqarfiit, kommuninilu ilinniaqqinnissamut ilitsersuisarfiit ingerlaavartumik suleqatigiinnissaat kommunalbestyrelsit qulakkeertussaavaat. Taama Namminersorlutik Oqartussat inatsisaanni 29. november 2013-mi atuutilersumi allaqqavoq.

Kommuni Kujallermi meeqqat atuarfianni naammassisimasut ingerlariaqqinnissaannik aqqutissiuussinissaq pingaartippaat.

-Meeqqat suli 18-iliineqanngitsut meeqqat atuarfiannit aniinnarsimasut naammassisimasullu, ilinniarniaqqinnissamillu aallartitsisimanngitsut attaveqarfigilluartarpagut, Qaqortumi Piareersarfimmi aqutsisoq Poul Jørgensen oqarpoq.

Namminersorlutik Oqartussat inatsisaanni allaqqavoq inuusuttut meeqqat atuarfiannit assigisaannilluunniit atuartussaatitaanermik naammassillutik atuarunnaarsimasunut, ilinniaqqinnermik inuussutissarsiornermilluunniit aallartitsisimanngitsunut, ilinniakkamilluunniit unitsitsisimasunut ujartuilluni ilitsersuisoqartassasoq.

Taannalu inatsit Kommuni Kujallermi atorluarneqarpoq.

- Paasiniaasartutut sulilluta inuusuttut 18-iliineqanngitsut ilinniaqqissimanngitsut pillugit paasissutissat pissarsiarisarpagut. Taamaalilluta inuusuttut ilinniaqqinnissamik aallartitsisimanngitsut angajoqqaavi allakkatigut attavigisarpagut, ilinniaqqinnissamullu ilitsersuinissamut meeraq angajoqqaallu aggersartarpagut. Taamaalilluta amerlasuut pissarsiarisarpagut, Poul Jørgensen, Qaqortumi Piareersarfimmi aqutsisuusoq oqarpoq.

Meeqqat atuarfiannit naammassisimasut 2013-imi suli ilinnigaqalersimanngitsut 683-iupput.