Ilinniagartooq: Silap pissusaata allanngoriartornera kalaallit atorluarpaat

Silap pissusaata allanngoriartornerata naggueqatigiinnut Inunnut sunniutai pillugit ilisimatusarnikuuvoq:

- Silap pissusaata allanngoriartornera eqqarsaatigalugu periarfissat amerlaqaat, ajornartorsiutaasinnaasulli aamma puigorneqarnikuunngillat. Oqallinneq taamaasilluni ammanerusarpoq, Mark Nutall Radioaviisimut oqarpoq.

Periarfissanut kalaallit tappissuunerat taassuma alutoraa. Aatsitassarsiornerulersinnaanermut, uuliamillu gassimillu qalluilersinnaanissamut aningaasarsiornermillu ineriartortitsinissamut kalaallit periarfissarsiullaqqissuunerarpai.

- Silap pissusaata allanngoriartornera ataatsimut isigalugu Nunarsuarmut sunniuteqapilukkumaartoq miserratissaanngilaq. Naleqqussaasoqartariaqarporli, periarfissallu nutaat inissaqartinneqartariaqarlutik, inuup pissusiinik ilinniagartooq oqarpoq.

- Pissutsinut nutaanut naleqqussarsinnaanertik kalaallit takutittareerpaat. 1900-kkut ingerlanerini silap pissusaata allanngoriartornerata sunniutai takuagut. Aalisarneq inerisarneqarpoq, aningaasaqarniarnermut qitiulluinnarluni. Pissutsit allanngorluinnarput, inuiaqatigiilli kalaallit pissutsinut naleqqussarput, tamannalu misissuivigineqartariaqarpoq, silap pissusaata allanngornerata sunniutai inuiaqatigiinnit qanoq qisuariaateqarfigineqartarnersut paasiniaavigineqartariaqarlutik, Mark Nutall oqarpoq.

Silap pissusaata allanngoriartornerata sunniutai inuup inuiaqatigiillu pissusiinik ilinniagartuup Mark Nutallip nammineq misigereerpai, ilinniarnerminut atatillugu Tunup Avannaarsuani sulinikuugami.