Ilinniagaqarsimanngitsunut ilinniarfimmik Tasiilami pilersitsisoqartussanngortoq
Perorsaanermut Ilinniarfimmut qinnuteqartuni 13-it Tunumeersuummata Perorsaanermut Ilinniarfik aalajangerpoq ikiortitut ilinniarfimmik Tasiilami pilersitsisoqassasoq.
- Nunatsinni ilinniarfiunerput eqqarsaatigalugu inuiaqatigiinnut akisussaaffeqarpugut. Meeqqat inuusuttuaqqallu pillugit pitsaaliuinermut suliniutinik qanoq ililluni pilersitsisoqarsinnaanersoq nalunngilarput, Perorsaanermut Ilinniarfimmi ulluinnarni aqutsisoq Nuka Kleeman oqarpoq.
AAMMA ATUARUK Qitinneq pinnguarnerlu Tasiilami atuartitsinermut iluaqutaasut
Ikiortitut ilinniarfinnik Upernavimmi Tasiilamilu peqarnikuuvoq, ilinniakkamullu tassunga qinnuteqartut amerlanerpaartaat Tasiilameersuummata ilinniakkamik taassuminnga Tasiilami maanna pilersitsisoqartussanngorpoq.
Meeqqat atugaannik alaatsinaariaatsinik ilinniartinneqassapput
Ikiortitut ilinniagaq meeqqanut ulluunerani neqerooruteqarfiusartuni sulisunut ilinniarsimanngitsunut meeqqanilluunniit sullissinermut tunngasumik ilinniarusuttunut naleqqussarlugu aaqqissuussaavoq.
Ikiortitut ilinniagaq inuussutissarsiutitigut ilinniakkatut taaneqartartoq modulinik arlalinnik immikkoortortaliusoq ulluni 40-ni qaammatit qulingiluat ingerlaneranni ingerlanneqartarpoq. Ilinniakkamik taassuminnga ingerlatsisussat meeqqanik timikkut, eqqarsartaatsikkut misigissutsikkullu ineriartortitsinermut, perorsaanermut, ilinniartitsinermut aammalu inuttut ineriartortitsinermut tunngasutigut piginnaanngorsarneqarnerisa saniasigut inersimasut meeqqallu inersimasullumi sunniiveqatigiittarnerannut tunngasunik ilinniartinneqassapput.
- Taamatuttaaq angajoqqaanik suleqateqarneq aammalu aaqqiagiinngittoqartillugu aaqqiissuteqarnermut periusissat nalunaaruteqarnermullu pisussaaffiit pillugit ilinniartinneqassapput, Perorsaanermut Ilinniarfimmi ulluinnarni aqutsisoq oqarpoq.
Ilinniarneq ilinniaqqinnissamut piumassuseqalersitsisarpoq
Perorsaanermut Ilinniarfimmit neriuutigaarput, sutigut tamatigut ilinniakkanik amerlanerusunik meeqqanut, inuusuttunut inersimasunullu iluaqutaasunik nunatsinni tamarmi siunissami pilersitsisoqarumaartoq. Ilinniartuutigisimasattami ikiortitut ilinniakkap ingerlarnga pillugu unnersiorfigisarpaativut.
Misigisaminnik isummersorsinnaanngornerartarput. Taamatuttaaq suliatigut taaguutit aalajangersimasut inunnik allanik sunniiveqatigiinnitsigut atortagassatik ilikkarnerartarpaat. Tamatuma saniatigut ilinniaqqinnissaminnut piumassuseqalertarput, Nuka Kleeman oqarpoq.
AAMMA ATUARUK Isumaginninnermi sulianik ingerlatsisoq: Tasiilami meeqqat ammarnerupput
Ikiortitut ilinniakkamik naammassinnereernerup kingorna isumaginninnermi ikiortitut ilinniakkamik Nuummi, Ilulissani Maniitsumilu maanna ingerlatsisoqarsinnaavoq.