Ilimanami ilimasussanngillat

Ilimanami talittarfeqarneq piffissami qanittumi pitsanngorsaavigineqarnavianngilaq, taamatut allappoq Ineqarnermut Attaveqarnermullu Naalakkersuisoq Jens B. Frederiksen inatsisartunut ilaasortap Siumumeersup Kristian Jeremiassenip paragaraf 36 atorlugu naalakkersuisunut apeqquteqaataanut akissuteqarluni.

Ilimanami takornariaqarnikkut piarerfissat pillugit, nunaqarfimmi talittarfeqarnerup qaqugu pitsanngorsaavigineqarnissaa Kristian Jeremiassenip apeqqutigaa.

Ilimanami taliffeqarnerup pitsanngorsaavigineqarnissaanut akissaqartoqanngitsoq, naalakkersuisup akissuteqarnermini nalunaaruutigaa.

Kalaallit Nunaanni umiarsualiviit tamarmik aserfallatsaalineqarnissaanut ukiumut 18 millioner koruuningaajaat immikkoortinneqartarput, aserfallatsaaliunerminilu kinguaattoorutit katillutik 80 millioner koruunit missaaniillutik Jens B. Frederiksen oqarpoq.

Aningaasat taakkua pingaarnersiulluni atorneqartussaapput, taamaalilluni aningaasat pigineqartut annertunerpaamik atorluarneqassallutik,

Nioqqutissanik atortunillu pilersuinerup qulakkeerneqarnissaanut aammalu ilaasut assartorneqarnerisa eqqarsaatigineqarnerat annertunerpaasoq, Jenes B. Frederiksen oqarpoq, erseqqissarlugulu aningaasassaqartoqartillugu takornariaqarnermut atortut eqqarsaatigineqarumaartut.

Nunaqarfinni taliffeqarfiit pilersaarusiorneqarnissaat aatsaat piumaarpoq, Assartuineq pillugu isumalioqatigiissittap Kalaallit Nunaanni attaveqaatinut tamarmiusunut nalileereerpat.

Assartuineq pillugu isumalioqatigiissitap isumaliutissiissutaa inatsisartut upernaaru matsimi ataatsimiinnerani oqaluuserineqarnissaa naatsorsuutigineqarpoq.